Амарай можын Тында хотодо эмхидхэгдэдэг бүхэроссиин мүрысөөндэ Буряадай түлөөлэгшэд найман медальда хүртөө.
“БАМ-ай хибэс” - заншалта мүрысөөн юм. Тэрэ байгша ондо 38-дахияа үнгэргэгдөө. Тэндэ илалта туйлабал, “Ородой спортын мастер” гэһэн нэрэ зэргэдэ тамиршад хүртэхэ аргатай. Тиимэһээ холо ойроһоо барилдаашад суглардаг юм. Энэшье удаа 24 можо хизаарай 120 гаран тамиршан хибэс дээрэ гараа.
74 килограммай шэгнүүртэ Чингис Мункуев алтан медаляар шагнагдажа, “спортын мастер” гэһэн нэрэ зэргэдэ хүртэхэ аргатай болоо. 125 килограммай Алексей Арганов түрүүлжэ гараа. Энэ шэгнүүртэ үсөөн хүн хабаадаһанһаа боложо, спортын мастер хэншье боложо шадаагүй.
Владимир Ринчинов болон Цыден Цыденов гэгшэд хоёрдохи һууринуудые эзэлээ. Зорикто Доржиев, Тамир Ускеев, Николай Шагдуров болон Айдар Санжиев гэгшэд гурбадахи һууринуудта гараа.
Тындын хибэс дээрэ Саха-Яхад Уласай барилдаашад ёһотойл эзэд боложо, долоон алтан медальтай гэртээ бусаа.