​Һур харбалгаар Ородой Кубогта хүртэхын түлөө мүрысөөндэ Буряадай тамиршад түрүүлээ

Ехэнхи һур харбагшад зунайнгаа халааниие һаяхана нээбэ. Ородой Кубогта хүртэхын түлөө мүрысөөн үнгэрһэн долоон хоногой эсэстэ үнгэргэгдэжэ, Буряадай тамиршад дүрбэн медальда хүртөө.

Алушта хотодо оршодог Ородой суглуулагдамал командануудай бэлэдхэл хэлгын “Крымский” гэһэн федеральна түбэй дэргэдэ заншалта ёһоороо харбагшад эртэ хабар уулзана. Хүйтэн бороотой, һалхитай уларилаар Алушта хото тамиршадые угтан абаа. Хэды тиигэбэшье, түрүүшын мүрысөөн эндэ эмхидхэгдээ.

- Ямаршье уларилай байхада, мүрысөөнүүдые эмхидхэхэ ёһотойбди. Юуб гэхэдэ, 2021 оной зунай халаанда гол тэмсээнүүд болоно. Ородой хэдэн шатын мүрысөөнүүдтэ суглуулагдамал командаяа бүридхэхэ ёһотойбди. Олимпиин наадануудта хэн хабаадахаб гэжэ эгээл тэдээн сооһоо элирүүлхэбди, - гэжэ һур харбалгын Ородой федерациин хүтэлбэрилэгшэ Владимир Ешеев нэгэтэ бэшэ хэлээ һэн.

Ородой түрүү харбагшад, тэрэ тоодо Буряадай долоон тамиршан, Алушта ерэхынгээ урдахана Турцида һорилго гараа, Хорватида мүрысөөндэ хабаадаа.

Классическа түхэлэй номо һуршаар харбалгада эхэнэрнүүдэй дунда Буряадаймнай хоёр тамиршан финалда гаража шадаа. Һүүлэй жэлнүүдтэ түрүү харбагшадай тоодо оролсоһон Светлана Гомбоева залуу тамиршан Виктория Харитоновае илажа, алтан медальда хүртөө. Харин Вика шангай 2-дохи һуури эзэлээ. Буряадай үшөө нэгэ залуу тамиршан Содемидэ Батусыжень 4-дэхи һуурида гараһаниинь ехэ һайн дүн гэжэ мэргэжэлтэд тоолоно.

- Хүйтэн һалхинай, борооной үедэ Алушта ерээд харбаабди. Түрүүшын шатада аяар холын 24-дэхи һуурида гараад, харуулһан дүнгөөрөө урмашанагүйб. Финальна шатын үедэ нэгэ бага дулаараа. Тэндэ түрүүлһэндээ баяртайб. Түрүүшын һоригшо Ольга Михайловна Галушко болон мүнөөнэй багша Константин Дашиевич Эрдыниев хоёрто бүхыгөөрөө һайниие хүргэхэ байнаб, - гэжэ социальна сүлжээнэйнгээ хуудаһанда Светлана Гомбоева бэшээ.

Классическа түхэлэй номо һуршаар харбалгада эрэшүүлэй дунда Цырен Балтаков түрүүлжэ, Ородой Кубогта хүртэһэн байна. Хэндэшье үшөө мэдэгдээгүй Москвагай түлөөлэгшэ Максим Калинушкиные тэрэ финалда шүүжэ гараа. Буряадһаа гарбалтай, мүнөө Москвагай түлөө харбадаг Алдар Цыбикжапов шангай гурбадахи һуури эзэлээ.

Командна тоосоондо Буряадай эрэшүүлэй команда хүрэл медаль абаһан байна. Эрдэм Цыдыпов, Эрдэм Ирдынеев болон Цырен Балтаков гэгшэд эндэ харбаа.

Эдэ үдэрнүүдтэ Алушта хотодо ехэшүүлэй дунда Ородой чемпионат үнгэргэгдэнэ. Удаань эрэмдэг бэетэйшүүлэй дунда хоёр мүрысөөн эмхидхэгдэхэ юм.