565
Катар гүрэндэ 2022 оной һүүл багаар үнгэргэгдэхэ дэлхэйн чемпионадта шэлэн абалгын нааданууд үргэлжэлһөөр. Энэ үдэрнүүдтэ ээлжээтэ наадануудаа Монголой команда үнгэргөө.
Азиин командануудай дунда Монголой тамиршад “F” бүлэгтэ наадана гээд һануулая.
Душанбе хотодо Таджикистанай командатай наадахадаа, 0:3 гэһэн тоотойгоор шүүгдэһэн байна.
Удаадахи наадаяа Монголой команда Япондо үнгэргөө. Талмайн эзэд 14:0 гэһэн тоотойгоор илалта туйлаа. Нааданай һүүлшын 10 минутын хугасаада Монголой бартаа руу аяар 6 бүмбэгэ оруулагдаа.
Тус уулзалгануудай удаа Монголой футболистнууд 3 очко абажа, һүүлшын 6-дахи һуури эзэлнэ. 15 очко абаһан Японой наадагшад түрүү һуурида ябана. Таджикистанай болон Кыргызстанай команданууд удаадахи һууринуудые эзэлнэ.
“F” бүлэгтэ үлэһэн бүхы нааданууд Японой дэбисхэр дээрэ шиидхэбэри абтаа. Тиигэжэ июнь һарын эхиндэ Монголой команда үшөө хоёр нааданда хабаадаха.
Автор: Борис БАЛДАНОВ
Фото: Монцамэ
