​Һур харбалгаар Буряадай тамиршадай амжалта

Крым Уласай Алушта хотодо һур харбалгаар зунай халаанай түрүүшын мүрысөөнүүд түгэсэбэ. Эндэ дахинаа Буряадай тамиршад шалгараа.

 Ехэшүүлэй дунда Ородой чемпионат олониие гайхуулаа. Юуб гэхэдэ, Ородой Кубогта шалгарһан тамиршадай нэгэнииньшье урдахи амжалтаяа дабтажа шадаагүй.

Манай суута харбагша Бальжинима Цыремпилов энэ удаа һайн дүн харуулаа. Олон залуу тамиршадые илажа, тэрэ шангай 2-дохи һуурида гараа. Һүүлшын шатада Үбэр Байгалай хизаарай Эрдэм Должиновта шүүгдэһэн байна. Эхэнэрнүүдэй дунда харбаанда Виктория Будаева финалда хүрэжэ, Үбэр Байгалай хизаарай залуу мэргэн Виктория Намдаковада шүүгдэжэ, мүнгэн медаляар урмашуулагдаа. Олимпиин наадануудта хүрэл медальда хүртэһэн Ксения Перовае шүүһэн Соёлма Сыренова хүрэл медаль абаһан байна.

Командна тоосоондо Буряадай эрэшүүл Ородой чемпионой нэрэ зэргэдэ хүртөө. Эрдэм Цыдыпов, Бальжинима Цыремпилов, Цырен Балтаков гэгшэд Псковой болон Московско можонуудай ба Үбэр Байгалай хизаарай тамиршадые илажа гараа.

Мүнөөдэр, апрелиин 7-до, Турциин Анталья хотодо “Европын Гран- при” гэһэн мүрысөөнэй 2-дохи шата эхиеэ абахань. Буряадай тамиршад Цырен Балтаков, Виктория Будаева, Светлана Гомбоева, Инна Степанова болон Эрдэм Цыдыпов гэгшэд тэндэ хабаадахаар хараалагданхай. Иигэжэ Ородой суглуулагдамал командын гэшүүд Олимпиин наадануудта бэлэдхэлээ хэжэ байна.

Эрэмдэг бэетэйшүүл Паралимпиин наадануудта хабаадахаяа бэлэдхэлээ эхилээ. Ородой Кубогта хүртэхын түлөө мүрысөөн зунай халаанай түрүүшын тэмсээн боложо үгөө. Блочно түхэлэй номо һуршаар харбалгада Буряадай тамиршад Баир Шигаев болон Бадма Хаминдаев суг хамта уулзаа. Эндэ Баир Шигаев чемпионой нэрэ зэргэдэ хүртөө.

Командна микст тоосоондо Баир Шигаев ба Татьяна Андриевская гэгшэд Москвагай тамиршадта шүүгдээшье һаа, мүнгэн медальнуудые абаа.

Эрэмдэг бэетэйшүүлэй суглуулагдамал командын бүридэл үшөө хэдэн мүрысөөнүүдэй удаа мэдэгдэхэ.