​Буряадай тамиршадай ялас гэмэ амжалтанууд

Һаяын үдэрнүүдтэ Улаан-Үдэ хотодо 19-22 наһа хүрөөдүй тамиршадай дунда боксоор Алас Дурна зүгэй федеральна тойрогой чемпионат үнгэргэгдэбэ. Мүн Буряадай тамиршад Краснодарай хизаарта болон Тулын можодо шалгараа.

Дүрбэн үдэрэй туршада болоһон шанга тулалдаануудта зүүн зүгэй зургаан можо хизаарай түлөөлэгшэд ринг дээрэ гараа. Буряад Уласаа эгээл мэдээжэ залуу тамиршад түлөөлһэн байна.

- Эхэнэрнүүдэй дунда тулалдаануудта Людмила Воронцова болон Кристина Ткачёва хабаадаа. Юуб гэхэдэ, эдэмнай үни удаан мүрысөөнүүдтэ хабаадангүй үлэшэнхэй. Людмила уласхоорондын хэдэн мүрысөөнүүдтэ хабаадахаар хараална. Харин Кристина жэлэй түгэсэтэр тулалдаануудта оронгүй үлэшэхэ аргатай. Тиимэһээ эндэ бэеэ туршахыень дурадхаабди. Урдань ганса Ородой чемпионат байна, - гэжэ эхэнэрнүүдэй мэдээжэ һоригшо Бадма Бадмаев мэдүүлнэ.

Буряадые түлөөлжэ, ринг дээрэ гараһан 17 тамиршадай 13-иинь мүрысөөнэй финалда орожо шадаһаниинь һайшаалтай. Эхэнэрнүүдэй дунда Людмила Воронцова болон Кристина Ткачёва гэгшэд шүүхээрээ шүүбэ. Үшөө нэгэ чемпионой нэрэ зэргэдэ Эржена Бадмаринчинова хүртөө.

Эрэшүүлэй дунда тулалдаануудта Баир Батлаев, Альберт Гатаулин, Радна Цыбиков болон Максим Парфёнов гэгшэд шалгаржа, алтан медальнуудые абаа.

Тус мүрысөөндэ илалта туйлаһан тамиршад Ородой чемпионадта хабаадаха эрхэдэ хүртөө. 19- 22 наһатайшуул апрелиин 24-һөө майн 2 болотор Московско можодо сугларха юм.