Россиин чемпионат Буряадта үнгэргэгдэхэнь

Эхэнэрнүүдэй дунда сүлөөтэ барилдаагаар ехэ мүрысөөн байгша оной майн 10-һаа 13 болотор Улаан-Үдэ хотын Физкультура болон спортын комплекс соо болохо.
 Майн 10-да бүхы шэгнүүрнүүдтэ тэмсэхэ барилдаашад тодорхойлогдохо, шүүгшэдэй зүблөөн, командануудай түлөөлэгшэдэй суглаан  болон жээрэб таталга үнгэргэгдэхэ. Бусадшье эмхидхэлэй талаар асуудалнууд харагдаха. Майн 11-12-ай үдэрнүүдтэ мүрысөөн болохо. Энэ турнирта барилдааша басагад 50, 53, 55, 57, 59, 62, 65, 68, 72, 76 килограммай шэгнүүрнүүдтэ хаба шадалаа туршаха байна. 
Майн 12-то шангай гурбадахи һуури эзэлхын түлөө тэмсээн үнгэргэгдэхэ. Энэл үдэрэй оройн 18:40 сагһаа түгэсхэлэй уулзалганууд боложо, чемпионуудай шэнэ нэрэнүүд тодорхо. 
Тус турнирһаа урид, 2020 ондо Казань хотодо болоһон Ород Уласай чемпионадта Буряад Уласаа түлөөлжэ ошоһон  басагад 5 медальда хүртэһэн юм. Ульяна Токуренова, Вероника Чумикова хоёр алтан медаль шүүгээ, Мария Кузнецова, Ирина Ологонова гэгшэд мүнгэн медальда хүртөө, Евгения Захарченко хүрэл медаль абаһан байна.