677
Московско можын Нарофоминск хотодо үнгэрһэн Ородой чемпионат 51 можо хизаарнуудай 250 гаран басагадые суглуулаа.
14 наһатай Аяна Цыренжапова бүри аха тамиршадтай тэмсэжэ, шангай 2-дохи һуури эзэлээ. Тус мүрысөөндэ Аяна Цыренжапова 49 килограммай шэгнүүртэ хибэс дээрэ гаража, Воронежой, Хакаси Уласай, Эрхүү можын болон Москва хотын түлөөлэгшэдые илажа гараа. Финалда Санкт-Петербург хотын 14 наһатай Виоллета Бирюковада шүүгдэжэ, мүнгэн медаляар шагнагдаа.
Март һарын һүүл багаар болоһон 16 наһа хүрөөдүй тамиршадай дунда Ородой чемпионадта Аяна шангай 3-дахи һуури эзэлһэн байна. Калугада үнгэргэгдэһэн мүрысөөндэ Виоллета Бирюкова чемпион боложо тодороо һэн.
Аяна Цыренжапова Улаан-Үдэ хотын 52-дохи һургуулиин шаби юм. Вандан Базаров болон Любовь Усольцева гэгшэдэй ударидалга доро һорилго гарадаг.
Тус мүрысөөндэ Буряадай үшөө хоёр тамиршад 5-дахи һууринуудые эзэлээ. Эдэ хэд бэ гэбэл, Дулма Бадмаева болон Султана Жапова гэгшэд болоно.
Фото: Ородой чемпионадай сайтһаа зураг
