​Буряадай Ивалгын аймагай шатаршадай үнинэй хүлеэгдэһэн амжалта

Бүхэроссиин “Сагаан тэргэ” гэһэн түсэлэй уласай финальна шатада Ивалгын дунда һургуулиин шабинар түрүүлжэ гараад, Сочидо эмхидхэгдэхэ наадануудта хабаадаха эрхэдэ хүртэһэн байна.

Мүнөө жэлэй мүрысөөндэ 15 һургуули, тэрэ тоодо 6 хүдөөгэй команда хабаадаа. Хэзээ һүүлшынхиеэ хүдөө һууринай шатаршад түрүүлһэн бэ гэжэ шатарай олон мэргэжэлтэд болон үндэр наһатай һоригшод хэлэжэ шадабагүй. Тиимэһээ Ивалгын наадагшадые түүхэдэ оруулхаар.

Һоригшо Цыренжап Очирович Хоргановай ударидалга доро бэлэдхэл гарадаг тамиршад мүрысөөнэй түрүүшын табан шатада илалтануудые туйлаһан байна. Һүүлшын 6-дахи шатада тэдэ оройдоол 1,5 очко абабал, заал һаа түрүүлхэ байгаа. Теэд ивалгынхид ниислэлэй 49-дэхи һургуулиин наадагшадта 1:3 гэһэн тоотойгоор шүүгдээ. Тэдэниие хүсөөд гараха арга боломжодо 33-дахи гимназиин болон 19-дэхи һургуулиин үхибүүд хүртөө.

Һүүлэй һүүлдэ гурбан команда тон адли 16,5 очкотойгоор мүрысөөгөө түгэсэбэ. Нэмэлтэ коэффициент тоологдоһоной удаа Ивалгын команда чемпион боложо тодороо. Һүүлэй жэлнүүдтэ “Сагаан тэргын” түрүү һуури алдадаггүй 33- дахи гимназиин команда энэ удаа шангай 2-дохи һуурида гараа. 19-дэхи һургуулиинхид хүрэл медальда хүртөө.

Ивалгын дунда һургуулиин түлөө Алдар Бабаринов, Михаил Базаров, Кирилл Жидков болон Кира Маланова гэгшэд наадажа, алтан медальнуудаар шагнагдаа.

Заншалта ёһоороо түрүү һуури эзэлэгшэдэй нэрэнүүд хюлгэ бүхэн дээрэ элирүүлэгдээ. 19- дэхи һургуулиин Эрдэм Хубукшанов, 33-дахи гимназиин Батор Жамбалов болон Ардан Дунцаев, мүн Буряадай Үндэһэтэнэй 1-дэхи лицей-интернат һургуулиин Татьяна Имыхелова гэгшэд 1-дэхи һуури өөр өөрын хюлгэ дээрэ эзэлээ.

Майн һүүл багаар Сочи хотодо “Сагаан тэргэ” түсэлэй бүхэроссиин финал эмхидхэгдэхэ. Ивалгын һурагшад тэндэ хабаадажа, һайн дүн харуулхаяа бэлэн байһанаа мэдүүлээ.