​Монголой боксёрнууд Ази түбиин мүрысөөндэ бэлдэнэ

Боксоор Азиин чемпионадта бэлэдхэл гаража байһан Монгол ороной тамиршад Чехидэ болоһон уласхоорондын мүрысөөндэ шалгараа. Тэдэ юһэн медальда хүртөө.

Чехи гүрэнэй Усти-над-Лабем хотодо заншалта болоһон уласхоорондын мүрысөөн 51-дэхиеэ үнгэргэгдөө гээд хэлэлтэй. “Хамта амжалта туйлая!” гэһэн уряа доро Монголой боксёрнууд мүрысөөнүүдтэ хабаадана, һорилгын хэмжээ ябуулгануудые үнгэргэнэ.

Монголойхиид уряагаа Чехидэ бэелүүлээ. Хоёр алтан, табан мүнгэн болон хоёр хүрэл медальнууд энээниие гэршэлнэ. Тиигэжэ Монголой боксёрнууд командна тоосоондо түрүүлжэ гараа.

Эхэнэрнүүдэй дунда тулалдаануудта 57 килограммай шэгнүүртэ Есугэйн Оюнцэцэг 1-дэхи һуурида гараа. Эрэшүүлэй дунда Монголой дүрбэн тамиршад финалда орожо шадаа. Тэдээн сооһоо Цэндбаатар Эрдэнэбат гэгшэ гансаараа чемпион боложо тодороо.

Мүнөө үедэ Монголой суглуулагдамал команда майн 10-һаа Германида бэлдэлгын хэмжээ ябуулгада хабаадана. Тэндэ Куба болон Германи гүрэнэй түлөөлэгшэд бэлэдхэл гарана. Дубай хотодо майн 21-дэ эхилхэ Азиин чемпионадта тамиршад тэндэһээнь ниидэхэ.

Ази түбиин гүрэнүүдэй дунда Олимпиин наадануудта шэлэн абалгын шата болюулагдаһан байна. Тиимэһээ ямар гүрэн хэды боксернуудаа Токио эльгээхэб гэжэ үшөө мэдэгдэнэгүй. Олоной һанамжаар тус Азиин чемпионат энэ асуудалда харюунуудые үгэхэ гээшэ.