Буряадай барилдааша басагад харагшадаа долоон медаляар баясуулаа

Буряадай тамиршад Ирина Ологонова болон Мария Кузнецова гэгшэд чемпионууд боложо тодороо.

2021 оной август һарада үнгэргэгдэхэ Олимпиин наадануудта Ородой суглуулагдамал командын бүридэлдэ хэд орожо хабаадахаб гэжэ эгээл Улаан-Үдэдэ мэдэгдэхэ байгаа. Теэд олохон шэгнүүртэ Олимпиадада ошохо басагадай нэрэнүүд һүүлдэ, һорилгын хэмжээ ябуулга болон Польшодо болохо уласхоорондын мүрысөөнэй удаа элирүүлэгдэхэ. Энээн тухай ахамад һоригшо Александр Борзунов абаһаар лэ мэдүүлээ.

57 килограммай шэгнүүртэ Ирина Ологонова финалда Дагестанай Хатижат Муртузалиевае шүүжэ, чемпион боложо тодороо.

65 килограммай шэгнүүртэ Чуваш Уласһаа уг гарбалтай, мүнөө Буряад орониие түлөөлдэг Мария Кузнецова 1-дэхи һуурида гараа. Эрхүү можын Кристина Тамразян гэгшые тэрэ финалда шүүжэ шадаа. Һонирхолтой гэхэдэ, Эхирид-Булагадай аймагай уг гарбалтай Кристина мүнөө үедэ Буряадай гүрэнэй хүдөө ажахын академиин оюутан юм.

53 килограммай шэгнүүртэ барилдаһан Стальвира Оршуш финалда гараад, үнинэйнгээ алдуу гаргажа, уулзалгын һүүлшын сагта шүүгдөө. Энэнь Токиоһоо буряадай тамиршаниие холодуулба гээшэ гү? Эндэ диилэһэн Анжелика Ветошкина һаяхана Европын чемпион болоһон Ольга Хорошавцева хоёрой хэниинь Олимпиада ошохоб гэжэ элирүүлэгдэхэ болоо хаш.

Шангай 3-дахи һууринуудые Нина Адучиева (Менкенова), Наиля Абзалова болон Анна Щербакова гэгшэд эзэлээ. Нина Адучиевае онсолон тэмдэглэхээр. Юуб гэхэдэ, тэрэ 2020 ондо хадамда гараад, үхибүүтэй болоо. Оройдоол 9 һаратай София басагаяа орхижо, Нина хүрэл медальда хүртөө.

Ород гүрэнэй барилдаанай федерациин хүтэлбэрилэгшын 1-дэхи орлогшо Арсен Фадзаевай тэмдэглэһээр, тус мүрысөө Буряад Улас үндэр хэмжээндэ эмхидхээ.

- Ямар холоб, тэндэ хүйтэн гэхэ мэтэ элдэб шалтагаа тамиршад урид бэдэрдэг байһанаа, мүнөө дуратайгаар Улаан-Үдэдэ болодог мүрысөөнүүдтэ ерэдэг болоо. Энэнь эмхидхэгшэдэй тон ехэ үүргэ, - гэжэ Арсен Фадзаев мэдүүлээ.