​Светлана Гомбоева – шэнэ одон

Дэлхэйн Кубогта хүртэхын түлөө мүрысөөнэй 2-дохи шатада ялас гэмэ амжалтануудые Буряадай тамиршад туйлаба. Светлана Гомбоева хубиин тоосоондо шалгаржа, түрүү һуури эзэлээ. Шангай һууринуудта Инна Степанова болон Виктория Бальжанова гэгшэд гараа.

Дэлхэйн Кубогай 2-дохи шата Хитадай Шанхай хотодо үнгэргэгдэхэ байгаа. Теэд коронавирус үбшэнэй талаар тэндэ орёо оршон байдал тогтоһонһоо боложо, тус хэмжээ ябуулга Щвейцариин Лозанна хотодо эмхидхэгдээ. Удха шанар ехэтэй мүрысөөндэ 35 гүрэнэй 250 тамиршан хабаадаа гээд хэлэлтэй.

Хубиин тоосоондо Светлана Гомбоева чемпион боложо тодороо. Франци гүрэнэй гурбан түлөөлэгшые, Нидерландын болон Германиин тамиршадые Буряадай тамиршан илажа гараа.

Олимпиин наадануудта мүнгэн медальда хүртэһэн Ксения Пероватай финалда уулзажа, шадамар бэрхээр шүүжэ гараа. Командна тоосоондо Светлана Гомбоева, Инна Степанова болон Елена Осипова гэгшэд шангай 3-дахи һуури эзэлээ. Хүрэл медальда хүртэхын түлөө тулалдаанда үнөөхил Франциин харбааша басагадые илаһан байна.

Блочно түхэлэй номо һуршаар харбалгада Захааминһаа гарбалтай Виктория Бальжанова мүнгэн медальда хүртөө. Наталья Авдеева, Арина Черкесова болон Виктория Бальжанова гэгшэд финалда США-гай тамиршадта шүүгдээ.

Эрэшүүлэй дунда мүрысөөндэ Эрдэм Цыдыпов баһа амжалтатайгаар хабаадаа, тэрэнэй 5-дахи һуури эзэлһэндэнь баярламаар.

Олимпиин наада хараадаа абан...

Эрдэм Цыдыповэй үндэр һуури эзэлһэниинь спортдо дуратайшуулай болон һоригшодой сэдьхэл дулаасуулна. Юундэб гэхэдэ, Ородой суглуулагдамал команда Олимпиин наадануудта ошохо эрхэдэ үшөө хүртөөгүй байна бшуу.

“Европейский Гран-при” гэһэн уласхоорондын мүрысөөнэй хоёр шатада Үбэр Байгалай хизаарай буряад угтай Бэликто Цынгуев болон Галсан Базаржапов гэгшэд һаяхана чемпионууд болоо һэн. Тиимэһээ июнь һарын эхиндэ үнгэргэгдэхэ Европын чемпионадай үедэ тэдэ Олимпиадада лицензи абаха бэзэ гээд найданабди.

Июниин 18-24-эй үдэрнүүдтэ үнгэргэгдэхэ дэлхэйн Кубогта хүртэхын түлөө мүрысөөнэй 3-дахи шатын үедэ Олимпиадада ошохо һүүлшын арга боломжо олгуулагдаха гээд мэдүүлэе.

Харин эхэнэрнүүдэй суглуулагдамал команда үнинэй путёвконуудые абанхай. Теэд хэниинь Токио ошохоб гэжэ мүнөөнэй мүрысөөнүүдтэ элирүүлэгдэжэ байнхай.

Түүхэдэ ороо

Тус амжалта туйлажа, Светлана Гомбоева түүхэдэ ороһон байна. Юундэб гэхэдэ, дэлхэйн Кубогта хүртэхын түлөө мүрысөөнэй шатануудта Буряадай оройдоо гурбан тамиршан шалгаржа шадаһан юм. Эдэ хэд бэ гэбэл, Бальжинима Цыремпилов, Наталья Эрдыниева болон Инна Степанова гэгшэд болоно.

Дэлхэйн кубок мүнөөнэй гуримаар 2006 онһоо хойшо эмхидхэгдэнэ. Тиихэдэ мүрысөөнэй 4 шатын удаа финальна шатада оройдоол дүрбэн хүн хубиин тоосоондо хабаадаха эрхэдэ хүртэдэг байгаа һэн.

2007 оной халаанда амжалтатайгаар Буряадай тамиршад мүрысөөндэ оролсоо. Бальжинима Цыремпилов хоёр шатада шангай һуури эзэлээ, нэгэндэнь илалта туйлаа. Тэрэ финалда гаража, Дэлхэйн кубогта хүртөө бэлэй. Мүн Наталья Эрдыниева баһа гурбан шатада шалгараа. Финалда 3-дахи һуури эзэлһэн юм.

2013 оной мүрысөөнэй нэгэ шатада Инна Степанова түрүүлжэ гараһан түүхэтэй. Ород гүрэнэй тамиршад сооһоо оройдоол гурбан тамиршан Дэлхэйн кубогта хүртөө гээд хэлэлтэй. Бальжинима Цыремпиловһээ гадна Софья Гончарова болон Альбина Логинова гэгшэд болоно.

Танилсая!

Светлана Гомбоева номо һуршаар арбаад жэлэй саана харбажа эхилһэн байна. Тамиршанай өөрынь хэлэһээр, түрүүшээр миин лэ наадажа ябаһандал һанагша һэн.

- Тон багаһаа хойшо олон юумэндэ ябажа, бэеэ туршадаг һэм. Багадаа гүйхэ, ута зайда һүрэхэ дуратай байгааб. Һургуулиин ябахадаа, дуулажашье, хатаржашье туршааб. Мүн тиихэдэ зураха дуратай һэм. Һүүлэй үедэ фото-зурагуудай альбомуудые шэмэглэнэб. Харбахынгаа хажуугаар энэ ажал бүтээхэдэ, гоё даа, - гэжэ тамиршан хөөрэнэ.

Түрүүн Светлана блочно түхэлэй номо һуршаар харбажа һураа. Удаань классическа түхэлэй номо һуршаар харбалгада дурлаһан байна. Һайн дүнгүүдые харуулхын түлөө тэрэ Эрхүү можоһоо Улаан-Үдэ ерээ. Константин болон Гэрэлма Эрдыниевтэнэй ударидалга доро Светлана бэлдэлгэ гаража эхилээ. Ерэмсээрнь, дүнгүүдынь дээшээ боложо эхилээ. 2018 ондо эдиршүүлэй дунда дэлхэйн үбэлэй халаанай чемпионадта мүнгэн медальда хүртөө. Европын кубогта хүртэхын түлөө мүрысөөндэ өөрын наһанай бүлэгтэ алтан медаль абаа һэн.

Һүүлэй хэдэн жэлдэ Светлана Гомбоева һайн дүнгүүдые харуулжа, Ородой суглуулагдамал командын бүридэлдэ оруулагдаа. Иимэ залуу тамиршаниие юундэ гол командын гэшүүн болгоноб гэжэ байжа олон мэргэжэлтэд, һоригшод хэлсээ. Тус амжалтань тэдэнэй буруу байһыень гэршэлнэ. Иигэжэ Буряад Уласта олимпиин шэнэ найдал түрэбэ гээшэ.