Буряадай гүрэнэй хүдөө ажахын академиин ойн баярай тулалдаанууд

Буряадай гүрэнэй хүдөө ажахын академи 2021 ондо байгуулагдаһаар 90 жэлэйнгээ ойн баяр тэмдэглэжэ байнхай. Олон тоото хэмжээ ябуулгануудай дунда спортын мүрысөөнүүд үргэн дэлисэтэйгээр болоно. Һаяын үдэрнүүдтэ барилдаанай болон боксын шанга тулалдаанууд эмхидхэгдээ.

Барилдаанай дүнгүүд

Дээдэ һуралсалай гуламтын ректорэй уялгануудые дүүргэгшэ Бэлигтэ Цыбиковэй хэлэһээр, олон жэлэй хугасаада үндэр зиндаада гараһан тамиршад академи дүүргэһэн намтартай.

- 90 жэлэйнгээ ойн баярые үнгэргэхэдөө, ганса мэдээжэ багшанараа, оюутадаа дурсан һанана бэшэбди, мүн спортын талмай дээрэ һуралсалайнгаа гуламта холо ойгуур нэрлүүлжэ ябаһан хүбүүд, басагадаа һананабди. Спортын талаар олон мүрысөөнүүдые тэдээндээ зорюулһамнай удхатай, - гэжэ Бэлигтэ Цыбиков мэдүүлнэ.

Барилдаанай тулалдаануудые харахаяа һуралсалай гуламтые хүндэтэ дүүргэгшэдэй уригдаһаниинь һайшаалтай. Аха захатанай тэмдэглэһээр, иимэ мүрысөөн олон жэлдэ эндэ болоогүй. Саашадаа энэ мүрысөөн жэл бүри эмхидхэгдэхээр хэлсэгдээ. Гэхэтэй хамта, олон жэлдэ ректорээр хүдэлһэн, спортые аргагүй үндэр хэмжээндэ үргэһэн Алексанр Петрович Поповто барилдаанай удаадахи мүрысөөнүүд зорюулагдаха гээд хэлэгдээ.

“Академиин хүндэтэ дүүргэгшэ” гэһэн хүндэтэ тэмдэгүүд тамиршадта барюулагдаа. Эдэ хэд бэ гэбэл, Ирина Ологонова, Марина Вильмова, Базар Жалсапов, Даша Шарастепанов, Алдар Бальжинимаев, Содном Будажапов, Баир Батомункуев, Батор Базаров, Нина Адучиева (Менкенова), Гармажап Цыренов гэгшэд болоно гээшэ.

Хибэс дээрэ 116 тамиршад гараа. Тэдэ найман шэгнүүртэ түрүүшүүлые элирүүлһэн байна.

Хэмжээ ябуулгын үедэ номой сан дотор эмхидхэгдэһэн үзэсхэлэн сугларагшадай анхарал татаа.

Боксын тулалдаанууд

Буряад Уласай заншалта болоһон чемпионат Василий Александрович Шабаевта зорюулагдана. Аяар 10 дахин Буряадай абарга болоһон боксёр бүхы наһаараа хүдөө ажахын академидэ хүдэлһэн юм. Эндэ тэрэ ганса спортын талаар шалгараа бэшэ, мүн эрдэм шэнжэлгэдэ ехэтэ нүлөө үзүүлээ. Тиигэжэ Василий Шабаев профессорэй нэрэ зэргэдэ хүртөө һэн.

- 30 жэлэй саанахана манай мэдээжэ һоригшо Агбан Галсанович иимэ мүрысөө эмхидхэжэ эхилээ. Василий Александрович бүхы наһаараа мүрысөө эмхидхэлгэдэ туһа хүргэжэ, залуу тамиршадта һайхан зүбшэл үгэдэг байгаа. Хоёр жэлэй саана хүндэтэ багшамнай түрэлөө урилаа, - гэжэ БГСХА[1]гай боксын һоригшо Виталий Цыремпилов хөөрэнэ.

29-дэхиеэ эмхидхэгдэһэн мүрысөөндэ ганса эрэшүүл бэшэ, мүн эхэнэрнүүд хабаадаа. Мүнөө жэлдэ ринг дээрэ олон мэдээжэ тамиршад гараа гэхэдэ, алдуу болохогүй. Кристина Ткачёва, Радна Цыбиков болон бусадые нэрлэмээр. Шанга тулалдаануудай удаа Альберт Гатауллин эрхим боксёрой нэрэ зэргэдэ хүртөө.

Уданшьегүй һонирхолтой мүрысөөнүүд ойн баярай хэмжээ ябуулгануудые шэмэглэхэ гээд һанагдана.