545
Шайбатай хоккейгээр Буряад Уласай тэмсээн энэ амаралтын үдэрнүүдтэ түгэсэбэ. 6 команда мүрысөөндэ хабаадажа, "Дорожник"болон "Багатур" хоёр илагшые түхэсхэлэй уулзалгада элирүүлээ.
Ушар гэхэдэ, түгэсхэлэй уулзалгада хоёр команда мастер зиндаатай тамиршадые урихадань, харагшад аргагүй hайн наада хараха аргатай байба.
- Иимэ бэрхэ хүбүүдые урижа, яагаад халтирнаб, шайбаяа дамжуулнаб, яагаад сохиноб гэжэ хаража, дүй дүршэлөө дээшэлүүлнэбди, тиин олон зон хаража, наадаар hонирхоно, - гэжэ Буряадай хоккейн хорооной хүтэлбэрилэгшэ Вячеслав Воронцов хөөрэбэ.
Гэхэтэй хамта, хоккей харахаяа шамдагшад заатагүй ковидhоо hэргылэмжын тарилга абаhан гү, али коронавирусаар үбдэнхэй бэшэ гэжэ үнэмшэлгэ харуулха ёһотой байгаа.
Иимэ hайн шанартай наада хаража үзөөгүй харагшад ехэтэ хүлгөөтэ болобо, hанаагаа зобобо, хүхибэ. Тиихэ зуура, түрүүшын хугасаада "Дорожник" команда 3 шайба сохибо.
Забhарай үедэ "Багатур" командын капитан Иван Михайлов өөрын арга боломжонуудаа хэрэглэжэ оролдохобди гэжэ тэмдэглээ.
Тиигэжэ уулзалгын хоёрдохи хаhада сухалтай гаража, сагаан хубсаhатай тамиршад хэды дахин бартаашаниие сүмэ сохижо, тоогоороо хүсэжэ дүтэлбэ. 2 минутын үлөөд байхада, "Дорожник" командын хамгаалагша тэмсэгшэеэ буруу унагаажа, амархаяа ошоходонь, баатарнууд илалтын гол оруулжа, 6:5 гэhэн тоотойгоор илажа, хоёрдохиёо Буряад Уласай чемпион боложо тодороо.
Диилдэhэн командын добтологшо, энэ хадаа Магниторск хотын «Металлург» командын бүридэлдэ Гагаринай Кубогта хүртэhэн Владислав Калетник 4 шайба оруулаа, харин "Багатурай" бартаашан Александр Сокол илалта туйлалгада аргагүй нүлөө үзүүлээ гээд тэмдэглэгдээ.
Хоккей наадан харагшадта hонирхолтой гэжэ тус уулзалга харуулаа, харагшад гэр бүлөөрөө ерэһэн байна.
Буряад хүбүүд бэрхээр бэеэ hорино гээд тэмдэглэлтэй, жаахан үхибүүд тусхай олимпиин нөөсын hургуулида ябажа, наадаха бэлиг шадабарияа мүлижүүлнэ ха юм.
Автор: Эрдэни РАДНАЕВ
Фото: БГТРК
