Буряадай барилдааша хүүгэд - Дагестанда

Буряад бэрхэ хүбүүдэймнай нэгэн Владимир Жалсараев «Зугаалай» гэһэн барилдаанай хубиин клуб хэдэн жэлэй урда тээ байгуулһан гээд мэдэнэбди. Тэндэ буряад нютагайнгаа бэрхэ хүүгэдые асаржа, барилдаанай нюусануудтай танилсуулна.

Владимир Болотович өөрөө бага наһанһаа барилдаһан, СССР-эй спортын мастер гэһэн нэрэ зэргэтэй. Залуу наһандаа яһала амжалататай барилдажа ябаһан аад, хуби заяанай табисуураар тон эртүүр барилдаагаа дүүргэһэн байна. Тиигэжэ тэрэ олон жэлэй хугасаада олзын хэрэг эрхилжэ, урагшатайгаар ажаллаһанай, мүнөө өөрынгөө олоһон мүнгөөр эдирхэн барилдаашадые һурган хүмүүжүүлнэ. «Зугаалай» гэһэн клуб байгуулхадаа, тэрэ бэрхэ һоригшодые нэгэ доронь суглуулжа барилдаашадта һайн оршон байдал түхеэрэһэн юм.

Мүнөө тэрэ шабинарараа холын хадата Кавказай Дагестан Улас ошожо, һорилго хэхэһээ гадна Абдулманап Нурмагомедовэй шанда хүртэхын түлөө урилдаанда хабаадалсабад. Тэрэ суута тамиршан Хабиб Нурмагомедовай эсэгынь мүнхэ дурасхаалда зорюулагдаһан мүрысөөн болоно.

- Барилдаанай манлай бариһан тамиршадай тоонто нютаг ерээд байһандаа, хүүгэднэй ехэл баяртайнууд. Дагестанай хүүгэдээр сугтаа һорилго гаража дүршэл абахабди. Олон зоной хүлгөөн соо Хабиб Нурмагомедовтэй зэргэлжэ гэрэл зурагаа абхуулабди. Тэрэ ехэ ухаатай хүбүүн байна, англи хэлээр тордиһогүй хөөрэлдэнэ, - гэжэ хараһанаа «Зугаалай» гэһэн тамирай клуб байгуулһан Владимир Болотович өөрынгөө Фейсбук хуудаһандаа бэшэнэ.

Аргагүй буянтай хэрэг эрхилжэ ябаһан Владимир Жалсараевта ехэ баяр хүргэмөөр. Тэрэнэй оролдолгоор бэлигтэй һоригшодой ударидалга доро һураһан хүүгэд Олимпиин наадануудай алтан медаль абажа, Буряад ороноо холо ойгуур удангүй суурхуулхал. Хэжэ байһан ажал хэрэгтэнь амжалта хүсэе!