549
Буряадай эдиршүүл бүхэроссиин мүрысөөндэ амжалтатай хабаадаба
Хоца Намсараевай нэрэмжэтэ Хэжэнгын дунда һургуулиин шаби Бадма-Доржо Бадмацыренов болон Александр Халтагаров гэгшэд шангай 2-дохи һуури эзэлээ
Сочи хотодо хэдэн бүхэроссиин мүрысөөн үнгэргэгдэбэ. Хоца Намсараевай нэрэмжэтэ Хэжэнгын дунда һургуулиин шаби Бадма-Доржо Бадмацыренов болон Александр Халтагаров гэгшэд шангай 2-дохи һуури эзэлээ.
“Чудо-шашки” гэһэн бүхэроссиин мүрысөөнэй финалай шатада Хэжэнгын үхибүүд хабаадаһан байна. Олон жэлдэ һорилго хэдэг Цыбан Балдановай шабинар Буряад Уласаа түлөөлөө.
Бүхы дээрээ 24 можо, хизаарай 30 команда мүрысөөндэ хабаадаа. Тэдээн сооһоо хэжэнгынхид 41 очко абажа, 15-дахи һуури эзэлһэн байна. Архангельска, Тюмениин, Омско можонуудай болон Москва хотын командануудые тэдэ шүүжэ шадаа. Усть-Ордагай болон Уфагай тамиршадаар ана-мана наадаа.
Вероника Тунжинова, Бэликто Болотов, Бадма-Доржо Бадмацыренов, Дари Ешеева гэгшэд Хэжэнгын һургуулиин түлөө хара-сагаан хюлгын саана тулалдаа. Эгээл эрхим дүн БадмаДоржо Бадмацыренов харуулаа. 3-дахи хюлгэ дээрэ тэрэ 16 очко абаһан байна. Тиигэжэ тэрэ шангай 2-дохи һуурида гараа. Калуга хотын 14-дэхи һургуулиин Павел Семёнов түрүүлээ. Буряадай даамшантай адли очко абаһан Мурманска можын Апатиты хотын түлөөлэгшэ Михаил Лебедь 3-дахи һуурида гараа.
Командна тоосоондо Калуга хотын 14-дэхи һургуулиин шабинар чемпионууд боложо тодороо. Тус командын гурбан тамиршан өөр өөрын хюлгэ дээрэ диилэһэн байна. Удмурт Уласай Малая Пурга гэһэн хүдөө һууринай гимназиин үхибүүд мүнгэн медальда хүртөө. Санкт-Петербургын даамшад хүрэл медаляар шагнагдаа.
Эрхүү можые Усть-Ордагай 1-дэхи дунда һургуули түлөөлһэн байна. Роман Харандаев, Виктор Могзоев, Дамир Баинов болон Анна Баядаева гэгшэд дүн хамта 43 очко абажа, 6-дахи һуурида гараба.
Үхибүүдэй хажуугаар бүхэроссиин мүрысөөндэ ехэшүүл хабаадаһан байна. 26 можо, хизаарай 250 хүн эндэ наадаба. Буряадай даамшан Александр Халтагаров 11 очко абажа, шангай 2-дохи һуури эзэлжэ шадаа. Тула хотын уласхоорондын гроссмейстер Юрий Королёв түрүүлээ.
