​Шангай һуури эзэлээшьегүй һаа...

Буряадай боксёрнууд яһала һайнаар Ородой Кубогта хүртэхын түлөө мүрысөөндэ хабаадаһан байна. Хэды тиигэбэшье, Алас Дурна зүгэй федеральна тойрогой суглуулагдамал команда шангай һуури эзэлжэ шадаагүй.

Ородой Кубогта хүртэхын түлөө мүрысөөн 2018 онһоо һэргээгдээд, жэл бүри үнгэргэгдэнэ. Федеральна тойрогуудай болон федеральна түхэлэй хотонууд тус мүрысөөндэ командануудые табина. Тиимэһээ эндэ оройдоол 10 команда хабаадана гээшэ. Тэдэнэй бүридэлдэ 20 хүн хүрэтэр тамиршад орохо аргатай.

Урда жэлдэ Алас Дурна зүгэй команда түрүүшын уулзалгада шүүгдэжэ, 9-дэхи һуури эзэлһэн байна. Харин 2021 ондо тэдэ түрүүшын шата дабажа гараад, бүлэгэй тулалдаануудта орожо шадаа.

Энэ удаа Алас Дурна зүгэй командын бүридэлдэ Буряадай дүрбэн тамиршан оруулагдаа. Екатеринбург хотодо үнгэргэгдэһэн мүрысөөндэ Батор Сагалуев, Баир Батлаев, Альберт Гатаулин болон Радна Цыбиков гэгшэд ринг дээрэ гараа. Эндэ гурба дахин илалта Баир Батлаев болон Радна Цыбиков туйлаа. Хоёр дахин Батор Сагалуев шүүгээ. Оройдоол нэгэ уулзалга Альберт Гатаулин үнгэргэһэн байна. Олоной һанамжаар Альберт энэ уулзалгадаа һайн шаалдаа харуулжа диилээ. Теэд шүүгшэд суутай Бахтовар Назаровай гар үргэжэрхёо.

Бэшүүрэй аймагһаа уг гарбалтай Георгий Кушиташвили Түбэй федеральна тойрогой командын бүридэлдэ орожо, шангай 2-дохи һуури эзэлээ. Тэрэ гурба дахин ринг дээрэ гаража, бүхы уулзалгануудаа эрхимээр үнгэргөө.

Командна тоосоондо 5-дахи һуурида гараһан тамиршадые Буряадай Боксын федерациин хүтэлбэрилэгшэ, Арадай Хуралай һунгамал Валерий Доржиев угтан абаба.

- Шангай һуури абаагүйбди гэжэ бү голхорогты. Танай бүхы уулзалгануудые харааб, омогорхожо һуугааб. Танай ашаар Алас Дурна зүгэй команда анха түрүүшынхиеэ иимэ үндэр һуурида гаража шадаа, - гэжэ Валерий Доржиев тэмдэглээ.

Боксын хүтэлбэрилэгшын мэдээсэһээр, тамиршадые томо уласхоорондын болон бүхэроссиин мүрысөөнүүдтэ хабаадуулжа байхаар хараалагдана. Дүй дүршэлөө тэндэ түрүү тамиршаднай мүлихэ аргатай болоно бшуу.

Боксоор гүрэнэй һоригшо Доржо Шаргакшановай хэлэһээр, Алас Дурна зүгтэ мүнөө жэлдэ һайн команда суглуулагдаа. 5-дахи һуури эзэлһэниинь энээниие гэршэлнэ. Энэ уулзалгын түгэсхэлдэ Валерий Доржиев мүнгэн шангуудые тамиршадта болон һоригшодто барюулаа.