​Олимпиин наадануудые угтуулан

Буряад Уласые Олимпиин наадануудта гурбан тамиршан түлөөлхэнь. Тэдэ мүнөө һүүлшын һорилгын бэлэдхэлнүүдтэ хабаадажа байнхай.

Удангүй июлиин 23-да Токиодо бүхэдэлхэйн спортын найр наадан эхиеэ абахань. Тэрэ үшөө 2020 ондо үнгэргэгдэхэ һэн. Теэд үзэгдөө харагдаагүй үбшэнэй һүжэрһэнһөө боложо, наадануудай болзор хойшологдоһон байна.

Олимпиин наадануудта Ород гүрэниие 315 тамиршан түлөөлхэ гээд мэдэгдэбэ. Июлиин 5-да Ородой олимпиин хороон тусхай саарһа дансануудые эмхидхэгшэдтэ эльгээһэн байна. Энэ үдэрһөө хойшо командын бүридэлдэ һэлгэлтэнүүд болохо ёһогүй.

Ородой суглуулагдамал командын бүридэлдэ Буряад Уласай гурбан тамиршанай ороһондонь баярламаар.

Барилдаан

Июлиин 1-дэ барилдаагаар эхэнэрнүүдэй командын гэшүүд элирүүлэгдэбэ. 50 килограммай шэгнүүртэ хибэс дээрэ Стальвира Оршуш гараха гэжэ һоригшодой зүблэл шиидхэбэри абаа.

Һонирхолтой гэхэдэ, Стальвира Оршуш бага шэгнүүртэ үнинэй барилдаагүй бшуу. Ород гүрэнэй, Европын чемпионадуудта, уласхоорондын мүрысөөнүүдтэ тэрэ 53 ба 55 килограммай шэгнүүрнүүдтэ хабаадагша һэн. Тиимэһээ спортдо дуратайшуул Стальвира шэгнүүрээ зүбөөр бага болгожо шадаха гү, али үгы гү гэжэ һанаата болоно.

Ольга Хорошавцева, Валерия Коблова, Любовь Овчарова, Ханум Велиева болон Эрхүү можоһоо уг гарбалтай Наталья Воробьева гэгшэд Ород гүрэниие Токиодо түлөөлхэ. Эдэ басагадай олониие Буряадай ажаһуугшад өөрын нюдөөр хараһан байна. Юуб гэхэдэ, 2019 болон 2021 онуудта Улаан-Үдэдэ Ородой чемпионат болоо бэлэй гээд һануулая.

Олимпиин наадануудые үнгэргэжэ байһан эзэд эхэнэрнүүдэй барилдаанда ехэ дуратайнууд. Дэлхэй дээрэ эгээл шанга, дүй дүршэлтэй, нэрэ солотой тамирша басагад Япондо ажаһуудаг юм. Энэшье удаа тэдэ бүхы зургаан алтан медаль абахаяа эрмэлзэнэ.

Энэ ушарһаа боложо, эмхидхэгшэд эхэнэрнүүдэй дунда барилдаа аяар долоон хоногой хугасаада үнгэргэхэ гэжэ шиидэбэ. Нэгэ үдэр оройдоол нэгэ шэгнүүрэй тамиршад хибэс дээрэ гарахань. Барилдаанай мүрысөөн августын 1-дэ эхиеэ абаха. Энэ үдэр 76 килограммда барилдадаг эхэнэрнүүд тэмсээгээ эхилхэ.

Стальвира Оршуш августын 6-да барилдахаар хараалагдана. Энэ үдэр гурбан илалта туйлабал, тэрэ финалда гаража шадаха.

Буряадай спортдо дуратайшуул барилдааша эрэшүүлэй түлөө һанаагаа зобохол байха. Заур Угуев, Гаджимурад Рашидов, Заурбек Сидаков, Артур Найфонов, Абдулрашид Садулаев болон Сергей Козырев гэгшэд Улаан-Үдэдэ эмхидхэгдэһэн Ородой чемпионадта хабаадаа һэн гээд һануулая.

Ородой тамиршадтай хамта мүрысөөндэ хабаадаха Куба гүрэнэй барилдаашад һүүлшынгээ һорилгын хэмжээ ябуулга Якутск хотодо үнгэргэжэ байна.

Бокс

Эдэ үдэрнүүдтэ Байгал далайн эрье дээрэ Ородой эхэнэрнүүдэй суглуулагдамал команда һорилгоёо эмхидхэнэ. Командын бүридэлдэ Буряадаймнай Людмила Воронцова оруулагдаа бэлэй гээд һануулая.

Буряадай боксёр басаган 57 килограммай шэгнүүртэ шаалдаха юм. Энэ шэгнүүртэ бүхы дээрээ 20 хүн хабаадаха. Жээрэб таталганай болоһоной удаа хэзээ Людмила Воронцова ринг дээрэ гарахаб гэжэ мэдэгдэхэ. Түрүүшынгээ уулзалга тэрэ июлиин 24-дэ үнгэргэжэ магадгүй. Энэ үдэр үрысөөгөө эхилээгүй һаа, заал һаа июлиин 26-да шаалсаха.

Һур харбалга

Олимпиин наадануудта Ород гүрэнэй түлөө дүрбэн тамиршад харбаха. Буряад ороноймнай Светлана Гомбоева Токио ошохо эрхэдэ хүртөө. Үбэр Байгалай хизаарай Агын тойрогһоо уг гарбалтай Галсан Базаржапов мүрысөөндэ хабаадаха.

Һур харбалгын мүрысөөн июлиин 23-да эхиеэ абаха. Бүхы 128 хабаадагшад (64 эхэнэр, 64 эрэшүүл) тэмсээндэ оролсохо. Июлиин 24-дэ командна микст тоосоондо түрүү һуури эзэлэгшэд элирүүлэгдэхэ. Галсан Базаржаповтай хамта хэн хабаадахаб гэжэ урда үдэрынь мэдэгдэхэ. Светлана Гомбоева, Ксения Перова болон Елена Осипова гэгшэдэй хэниинь дээгүүр һуури эзэлнэб, тэрэнь Ород гүрэнөө микст тоосоондо түлөөлхэ юм.

Хэрэгтэй мэдээсэл

Олимпиин наадануудай нээлгын баяр ёһолол июлиин 23-да болохоор түсэблэгдэнэ. Хэды тиигэбэшье, футболистнууд түрүүшынгээ наадануудые июлиин 21-дэ үнгэргэхэ.

205 гүрэнэй 11 мянга гаран тамиршад Японой наадануудта хабаадахаар хараалагдана. Тэдэ 33 спортын зүйлөөр тэмсэжэ, 339 комплект медальнуудта хүртэхын түлөө эрмэлзэхэ.

Ород гүрэнэй түлөөлэгшэд бүхы зүйлнүүдтэ оролсохо эрхэдэ хүртэжэ шадаагүйдэнь харамтай. Баскетбол, футбол, гольф, бейсбол, водное поло (эрэшүүл), сёрфинг, скейтбординг, софтбол, хоккей на траве гэһэн зүйлнүүдээр Ородой тамиршадые харахагүйбди.

Буряадаймнай хүршэ болохо Монгол һайхан ороной 42 тамиршан Олимпиадада ошохоёо бэлдэжэ байнхай. Тэдэ спортын 10 зүйлөөр мүрысэхэ гээшэ.