​Бүхэдэлхэйн хэмжээндэ

Шэхэ хатуушуулай дунда барилдаагаар дэлхэйн чемпионадта Буряадаймнай тамиршад шалгараа. Хоёрынь дэлхэйн абарга боложо тодорһон байна.

Тус мүрысөөндэ хабаадахаяа Ородой суглуулагдамал командын бүридэлдэ Уласай спортын адаптивна һургуулиин дүрбэн тамиршан оруулагдаһан байна. Турциин Стамбул хотоһоо тэдэ булта медальтай бусаба.

Нэн түрүүн эдиршүүлэй дунда шанга тулалдаанууд үнгэргэгдөө. 61 килограммай шэгнүүртэ Буряадаймнай Иван Максимов чемпионой нэрэ зэргэдэ хүртөө. Өөрын наһанай бүлэгтэ Иван хоёрдохиёо дэлхэйн зэргэдэ шалгараа гээд хэлэлтэй. Сергей Максимов хүбүүнэйнгээ амжалта туйлаһанай түлөө бүхы һоригшодто баяраа социальна сүлжээнэй нюурхуудаһандаа мэдүүлээ.

Ехэшүүлэй дунда тэмсээнүүдтэ Буряадай гурбан тамиршан оролсоо. 61 килограммай шэгнүүртэ Даба Цырендоржиев Буряадай барилдаанай заншал үргэлжэлүүлжэ, түрүү һуурида гараа. 2020 ондо Даба Европын чемпионадта абарга боложо тодороо һэн.

Сергей Евтюнин 65 килограммай шэгнүүртэ шангай 2-дохи һуури эзэлһэниинь, тон ехэ амжалта гээшэ. 57 килограммда Бальжинима Раднаевай абаһан хүрэл медаль һайшаалтай.

Сырен-Доржо Андрёнов Баир Батомункуев хоёрой ударидалга доро бүлэг һоригшод шалгарһан тамиршадые бэлдэнэ гээд хэлэлтэй.