​Гиир үргэлгэ

Каунас (Литва). 18 наһа хүрөөдүй тамиршадай дунда дэлхэйн чемпионадта Буряадай тамиршад һаяхана хабаадаба. Загарайн Онохой һууринай Даниил Цвик мүнгэн медаль абаһан байна. Хяагтын Матвей Кожемякин шангай 3-дахи һуурида гараа.

Бокс

Лозанна. Боксын уласхоорондын федераци (AIBA) мүрысэхэ шэгнүүрнүүдые олон болгохо тухай шиидхэбэри абаба. Шэнэ гуримай ёһоор, эрэшүүлэй дунда 13 шэгнүүр дурадхагдана. Мүн эхэнэрнүүд 12 шэгнүүртэ шаалсаха болоно. Эдэ дүримүүд 2021 оной августын 1-һээ бэелүүлэгдэжэ эхилхэнь. Токиодо үнгэргэгдэхэ Олимпиин наадануудта эрэшүүл 8 шэгнүүртэ болон эхэнэрнүүд 5 шэгнүүртэ хубааран, түрүүшын һуури эзэлхэеэ эрмэлзэхэ гээд һануулая.

Хабаровск. Алас Дурна зүгэй федеральна тойрогой мүрысөөндэ Буряадай тамиршад 14 медальда хүртэһэн байна. Эржена Бадмаринчинова, Кристина Ткачева, Баир Батлаев, Радна Цыбиков болон Вадим Лубсанов гэгшэд түрүү һууринуудые эзэлээ. Үшөө табан хүн финалда шүүгдэжэ, мүнгэн медаляар шагнагдаа.

Түрүү һуури эзэлэгшэд Ородой чемпионадта хабаадаха эрхэдэ хүртөө.

Тольятти. Бүхэроссиин “Спартак” бүлгэмэй чемпионадта Буряадай тамиршан Альберт Гатаулин хабаадаһан байна. 56 килограмм хүрэтэр шэгнүүртэ шангай 2-дохи һуурида гараа. Севастополь хотын Дмитрий Шиповский гэгшэдэ Альберт финалда шүүгдээ.

Шатар

Туапсе. “Гран-при Черного моря” гэһэн шатарай фестиваль 10 шатаһаа бүридэжэ, хабарһаа хойшо эмхидхэгдэнэ. “Туапсе-2021” гэһэн мүрысөөндэнь Үбэр Байгалай хизаарай Агаһаа гарбалтай Яна Жапова амжалтатайгаар хабаадаба.

Һүүлэй үедэ Буряадай һоригшо Тимур Ивановой ударидалга доро бэлэдхэл хэжэ байһан Яна Жапова түргэн шатын тулалдаануудта шангай 3-дахи һуури эзэлээ. Мүн классическа наадалгаар эрэшүүлэй дунда 16-дахи һуури эзэлһэниинь һайшаалтай. Анха түрүүшынхиеэ уласхоорондын гроссмейстерые Яна шүүжэ шадаһан байна.

Хүнгэн атлетикэ

Казань. Һаяхана өөрын наһанай бүлэгтэ Ородой чемпионадта мүнгэн медальда хүртэһэн Буряадай тамиршан Максим Любовников ээлжээтэ амжалтаяа туйлаба. Тэрэ Казань хотодо үнгэргэгдэһэн оюутадай дунда Ородой чемпионадта хоёр медальда хүртөө. 800 метрэй зайда урилдаанда түрүүлжэ гараа. Мүн эстафетэдэ хүрэл медаляар шагнагдаа.