​Һур харбагшаднай шалгараа

Залуушуулай Спартакиадын мүрысөөндэ Буряадаймнай һур харбаашад шалгараа. Краснодар хотодо үнгэрһэн финальна шатада тэдэ дүрбэн медальда хүртөө.

Ород гүрэнэй залуушуулай Спартакиада дүрбэн жэлдэ нэгэ удаа болодог заншалтай. 2021 ондо 5-дахияа үнгэрнэ. Спортын 41 зүйлөөр тамиршад мүрысэнэ гээд хэлэлтэй. Буряадаймнай түлөөлэгшэдэй үсөөн тэмсээнүүдтэ хабаададагынь харамтай. Тиимэһээ һур харбаашадай үндэр дүнгүүд бултаниие баярлуулна.

Классическа түхэлэй номо һуршаар харбалгада Буряадай хоёр команда чемпионууд боложо тодороо. Руслан Серебряков, Энхэ Хандуев болон Сергей Цыренов гэгшэд Краснодарай хизаарай, Ростовой можын, Үбэр Байгалай хизаарай болон Башкортостан Уласай командануудые илажа, алтан медальда хүртөө. Басагадай дунда Номин Бальжинимаева, Виктория Харитонова болон Батусыжень Содемидэ гэгшэд финалда талмайн эзэдые шүүжэ гараад, 1-дэхи һуури эзэлээ.

- Блочно түхэлэй номо һуршаар харбалга анха түрүүшынхиеэ Спартакиадын бүридэлдэ оруулагдаа. Манай командые Сергей Шенхоров болон Валерия Балаганова гэгшэд түлөөлһэн байна. Хоёр медаль абажа, һайн дүнгүүдые тэдэ харуулаа гэжэ һананаб. Энэ мүрысөөндэ Валерия спортын мастер боложо шадаа. Командна микст тоосоондо хоюулаа хүрэл медаль абаба. Хубиин тоосоондо Сергей шангай хоёрдохи һуурида гараа, - гэжэ Буряадай командын һоригшо, шүүгшэ Зинаида Халудорова хөөрэнэ.

Мүнөө Буряадай залуушуул Орёл хотодо ошонхой. Хойно хойноһоонь эмхидхэгдэхэ Ородой хоёр чемпионадта тэдэ хабаадаха юм. Тэндэ шалгарһан тамиршад залуушуулай болон эдиршүүлэй дунда дэлхэйн чемпионадта хабаадаха эрхэдэ хүртэхэ.