​Урда солонгосойхид хүсэгдэхэ гү?

Олимпиин наадануудта һур харбалгаар урилдагшад һүүлшынгээ тулалдаануудые үнгэргэжэ байна. Буряадай тамиршад үшөө алтан медаль абаха аргатай.

Июлиин 23-да бүхы хабаадагшад харбажа, удаадахи шатада хэн хэнтэй уулзахаб гэжэ элирүүлээ. 1/32 ба 1/16 шатын мүрысөөн июлиин 27-29-эй үдэрнүүдтэ эмхидхэгдэнэ.

Буряадай тамиршан Светлана Гомбоева Нидерланды гүрэнэй Габриэла Шлёссертэй харбаха. Эдэ хоёр мүнөөнэй Олимпиадада командна тоосоондо 2-дохи һууринуудые эзэлһэн байна. Мүнгэн медаль абагшадай уулзалга июлиин 29-дэ үдэрэй 15 час 39 минутада эхилхэ. Ородой суглуулагдамал командын түрүү тамиршан Ксения Перова июлиин 29- дэ үглөөнэй 9 час 09 минутада Шэнэ Зеланди гүрэнэй Элис Инглитэй уулзахаар хараалагдана. Ородой командын гэшүүн Елена Осипова үсэгэлдэр харбалгаяа эхилээ.

 Эрэшүүлэй дунда хабаадажа байһан Үбэр Байгалай хизаарай буряад угтай Галсан Базаржапов Инди гүрэнэй Правин Жаднавтай харбаха. Энэ уулзалга июлиин 28-да үдэрэй 15 часта эхиеэ абахаар хараалагдана.

 Һур харбалгын мүрысөөнэй түрүүшын үдэрнүүдтэ Урда Солонгосой тамиршад гурбан алтан медальда хүртөө. Эхэнэрнүүдэй болон эрэшүүлэйнь команданууд заншалта ёһоороо түрүүлээ. Мүн тиихэдэ командна микст тоосоондо тэдэ шалгараа.

 Эхэнэрнүүдэй дунда командна тоосоон анха түрүүшынхиеэ 1988 ондо Олимпиин наадануудай бүридэлдэ оруулагдаа бэлэй. Тэрэ гэһээр Урда Солонгосой басагадые булиха харбагшад олдоногүй. Корейн эхэнэрнүүд 9-дэхиеэ түрүү һуурида гараба гээшэ.

Хубиин тоосоондо Урда Солонгосойхид баһа түрүү зэргэдэ ябадаг юм. Заримдаа алтан медаляа алдажархидаг. Харин мүнөө жэл хэн тэдэниие шүүхэб гээд асуудал гараадхина