839
Талаан мухардаа
Буряадай боксёр басаган Людмила Воронцова Олимпиин наадануудта азагүйдэжэ, түрүүшынгээ тулалдаанда шүүгдэшөө.
57 килограммай шэгнүүртэ Людмила Италиин һайн танил тамиршан Ирма Тестатэй уулзажа диилдэшөө. Удаадахи уулзалгадаа Италиин түлөөлэгшэ Ирландиин тамиршаниие шүүжэ, олимпиин медаль абахын түлөө харгыгаа үргэлжэлүүлээ.
Буряад Уласта Олимпиадада бэлэдхэл хэһэн үшөө хоёр тамиршад гэртээ бусахань. Саадат Далгатова болон Светлана Солуянова түрүүшынгээ тулалдаануудта шүүгдэһэн байна. Тиигэжэ эхэнэрнүүдэй суглуулагдамал командын гэшүүд сооһоо Земфира Магомедалиева үлөө. Тэрэ июлиин 28-да ринг дээрэ гараха юм.
Ахамад һоригшо Шидловский Олимпиин наадануудай урдахана гурбан медальда найдажа байһанаа мэдүүлээ һэн.
Үсэгэлдэр үглөөгүүр Людмила Воронцова нютагаа бусаба. Буряад Уласай Спортын болон залуушуулай хэрэгүүдэй яаманай, Олимпиин халаанай Уласай спортын һургуулиин мэргэжэлтэд тамиршаниие угтажа, баярай һайхан үгэнүүдые хэлэбэд.
Аха эгэшэ хоёрой амжалтанууд
Июлиин 25-да дзюдо барилдаанай татами дээрэ Хифуми болон Ута Абе аха дүү хоёр алтан медальнуудта хүртэбэ.
21 наһатай Ута Абе 52 килограммай шэгнүүртэ чемпионой нэрэ зэргэдэ хүртөө. 30 минута болоод, 66 килограммай шэгнүүртэ Утын аха, 23 наһатай Хифуми Абе Олимпиин абарга болоһон байна.
Эдэ хоёр 2018 ондо нэгэ үдэр дэлхэйн чемпионууд болоо һэн. Ута, Хуфими гэгшэд суутай тамиршад болонхой. Хоёр-хоёр дахин дэлхэйн чемпионуудай нэрэ зэргэдэ хүртэһэн намтартайнууд.
Залуу хүгшэнгүй...
Олимпиин наадануудай медальнуудта хүртэһэн тамиршадай наһанай хэмжээн ондо ондоо байна.
Шангай 3-дахи һуури Кувейтын 57 наһатай тамиршан эзэлээ. Абдула Аль-Рашиди скит буудалгада хабаадаад, хүрэл медаль абаба. Тэрэ 7-дохёо Олимпиин наадануудта хабаадана. Энэ хадаа хоёрдохи медалиинь болоно. 2016 ондо тэрэ баһа хүрэл медаль абаа бэлэй.
Кувейтын түлөөлэгшэ эгээл үндэр наһатай хабаадагша бэшэ. Бүри наһатай тамиршад мори урилдаанда хабаадана гээд хэлэлтэй. Австралиин тамиршад Мэри Ханна 66- тай, Эндрю Хой 62-той юм.
Олимпиадын бүридэлдэ түрүүшынхиеэ оруулагдаһан “скейтборд” гэһэн зүйлдэ ехэнхидээ залуушуул хабаадана. Чемпионой нэрэ зэргэдэ хүртэһэн Япон гүрэнэй Момидзи Нисия мүнөө 13-тайхан юм. Тэрэ августын 30-да 14 наһа гүйсэхэ. Шангай 2-дохи һуури эзэлһэн Бразилиин Раисса Леал баһа 13-тай, тэрэ 2008 оной январиин 8-да түрэһэн. Японой Фуна Накаяма хүрэл медальда 16 наһандаа хүртэбэ гээшэ.
Автор: Борис БАЛДАНОВ
