​Амжалтын амтан

Үсэгэлдэр, августын 3-да, Олимпиин наадануудта мүнгэн медальда хүртэһэн Светлана Гомбоевада үнэ сэнтэй бэлэг сэлэгүүд барюулагдаа. Буряад Уласай Хуулиин ёһоор, тэрээндэ хоёр таһалгатай байрын үнэмшэлгэ, 583 мянган түхэриг мүнгэн барюулагдаа. Хажуугаарнь һара бүри 24 мянган түхэриг тэдхэмжэ үзүүлэгдэжэ байха.

Токиоһоо Светлана августын 1-эй орой үдэшэ Эрхүү хото ниидэжэ ерээ. Хэды тиигэбэшье, Буряадһаа олон хүн угтахаяа ошоо. Мүн УстьОрдын тойрогһоо аха дүүнэрынь олоор сугларһан байна.

Виктория Викторовна хүгшэн эжыгээ, Ольга Александровна эжыгээ болон бусад түрэлхидөө хараад, Света нулимсаяашье унагаагаад абаа.

Буряадай Засагай газарай хүтэлбэрилэгшын орлогшо Вячеслав Цыбикжаповай тэмдэглэһээр, Ородой суглуулагдамал командын энэ ехэ амжалтада Буряадай харбагшын хубита угаа ехэ.

- Манай Светлана командын бусад гэшүүдһээ эгээл түрүүн харбаа. Сагаалсын дунда тудажа, бусад басагадтаа бата этигэл түрүүлээ, - гэжэ Буряадай һур харбалгын федерациин хүтэлбэрилэгшэ тэмдэглээ.

Һайхан баярай үгэнүүдэй удаа Светлана түрүүшынгээ һанамжануудаар хубаалдаа. Тэрэнэй хэлэһээр, иимэ томо амжалта туйлахадань, олон хүнүүд нүлөөлөө.

- Ольга Александровна эжынгээ туһалаагүй һаа, хаанашье хүрэхэгүй һэм. Мүрысөөндэ ошохомни - шэнэ номо һурша абахамни гэхэдэм, эжы нагаса хоёрни ходо мүнгэ олоод үгэжэл байдаг һэн. Хүгшэн эжымни багаһаа хойшо намайе дахуулжа, сагтань һургуулидам абаашажа, удаань хатарай, һур харбалгын һорилгонуудта хойнотуулангүй абаашаһанайнь ашаар сагаа һайнаар тааруулдаг болооб. Тиигээд һоригшодоо нэрлэхэ байнаб. Ольга Михайловна Галушко минии гарта номо һурша барюулжа, түрүүшын азануудтай танилсуулаа. Мүн Константин Дашеевич Эрдыниев мүлижэ, иимэ үндэр орьёлдо хүргөө, - гэжэ Светлана ерэмсээрээ хэлээ.

Константин Эрдыниев бултаниие амаршалһанай удаа, Олимпиин наадануудта шабиингаа хажууда байгаагүйб гэжэ шаналалаа мэдүүлээ.

- Олимпиин наадануудта хабаадаһан аяар долоон тамиршадые бэлдээб. Нэгэнэйншье түлөө иимэ ехээр һанаагаа зобоогүйб. Телевизорэй урда һуугаад, бэемни байнгүй һалганажа байгаа. Ганса һүхирөөд, бурхандаа мүргөөд һуугааб даа. Хажуудань байбал, тааруу үгэнүүдыешье олохо байгааб, - гэжэ мэдээжэ һоригшо хэлээ.

Буряадай тамиршанай үндэр амжалта хубаалдаад, бүри ехэ дабаануудые дабахыень хүсэе.