​Буряадай 49 һур харбаашад Ородой чемпионадта хабаадаха

Буряадай ниислэл хотодо үнгэргэгдэхэ һур харбалгаар Ородой чемпионадта 49 тамиршад уласаа түлөөлхэ.

- Ородой чемпионадта хабаадаха тухайгаа 17 можо нютагуудай команданууд мэдүүлээд байна. Ородой чемпионадай дүнгүүдээр дэлхэйн чемпионадта хабаадагшад элирүүлэгдэхэ. Дэлхэйн чемпионат США-да сентябрь һарада үнгэрхэ, - гэжэ Буряадай суглуулагдамал командын ахамад һоригшо Сэсэг Доржиева хэлэбэ.

Бурядаймнай командада Олимпиин наадануудай хабаадагшад, спортын габьяата манстернүүд оролсонхой. Тодорхойлбол, Бальжинима Цыремпилов (Атланта-1996, Сидней-2000, Афины-2004, Пекин-2008), Наталья Эрдыниева (Пекин-2008), Инна Степанова (серебро Рио-де-Жанейро-2016), Светлана Гомбоева (серебро Токио-2020).

- Дэлхэйн чемпионадта шэлэн абалга болохонь, тиимэһээ намда энэ ехэ удха шанартай. Дээдэ хэмжээнэй мүрысөөндэ бэлэдхэлэй ээлжээтэ шата болоно, - гэжэ Светлана Гомбоева Буряадта үнгэргэгдэхэ мүрысөөн тухай хэлэбэ.

Тиихэдэ хубиин тоосоондо медальнуудай 4 комплект болон команда тоосоондо 2 комплект медальнууд байха юм.

Улаан-Үдэдэ һур харбалгаар Ородой чемпионат 2011 ондо үнгэргэгдөө.Тиихэдэ Свердловско можын Ксения Перова, Буряадай Анна Балсукова (Бомбоева), Наталья Эрдыниева гэгшэд хубиин тоосоондо түрүү һууринуудые эзэлээ. Арбан жэлэй саана командна тоосоондо Бурядай эрэшүүлшье, эхэнэрнүүдшье шүүжэ гараа.