​Буряадай һур харбаашад Польшодо шалгараа 

Польшо гүрэнэй Вроцлав хотодо үнгэргэгдэһэн дэлхэйн чемпионадта Ородой суглуулагдамал команда дүрбэн медальда хүртөө. Буряад угтай хүбүүд, басагад шалгарагшадай тоодо оролсоһон байна.

Тус мүрысөөн эдиршүүлэй наһанай хоёр бүлэгтэ эмхидхэгдээ. Буряад Уласые эндэ хоёр тамиршад түлөөлөө. 2001- 2003 оной тамиршадай дунда блочно түхэлэй номо һуршаар харбадаг Сергей Шенхоров командна тоосоондо 7-дохи һуурида гараа. 2004-2006 оной харбагшадай тоодо Марина Агванова түрүүшынгээ уласхоорондын хэмжээнэй мүрысөөндэ хабаадажа, командна тоосоондо 9-дэхи һуурида гараа.

Үбэр Байгалай хизаарай буряад угтай зургаан тамиршан Вроцлав хото ошоһон юм. Тэдэнэй гурбаниинь шангай һууринуудые эзэлжэ шадаһаниинь һайшаалтай.

Бүхы амжалтануудаа Ородой тамиршад 2001-2003 оной бүлэгтэ туйлаба гээшэ. Багашуул үшөө диилэхэл байха гээд һоригшод тэмдэглэнэ.

Басагадай дунда Ородой команда шангай 2-дохи һуурида гараа. Үбэр Байгалай хизаарай Туяна Будажапова, Виктория Намдакова болон Москвагай Мария Гильманова гэгшэд финальна уулзалгада Японой тамиршадтай ана мана тулалдажа, нэмэлтэ годли табиһанай удаа шүүгдэбэ.

Командна микст тоосоондо Туяна Будажапова Буянто Осоров хоёр шангай 3-дахи һууриин түлөө уулзалгада Германиин түлөөлэгшэдые илажа, хүрэл медаль абаа.

Хубиин тоосоондо Башкортостан Уласай Станислав Черемискин мүнгэн медаль абаа. Эндэ Буянто Осоров 4-дэхи һуурида гараа.