341
Буряадай тамиршан Наталья Шадрина Польшодо болоһон уласхоорондын мүрысөөндэ түрүү һуури эзэлбэ. Тэрэ Сербиие түлөөлжэ, шэнэ гүрэнэйнгөө түлөө түрүүшын амжалта туйлаба.
Польшо гүрэнэй Гливице хотодо Наталья Шадрина Швеци, Хорвати, Польшо болон Ородой тамиршадые шүүжэ гараа. Энэ мүрысөөндэ Буряадай тамиршан 63 килограммай шэгнүүртэ ринг дээрэ гараа.
Буряад Уласай Арадай Хуралай һунгамал, Боксын федерациин хүтэлбэрилэгшэ Валерий Доржиевай хэлэһээр, 2021 оной эхинһээ Сербиин боксын хүтэлбэрилэгшэдтэй хөөрэлдөөнүүд болоһон байна.
- Анха түрүүшынхиеэ эхэнэрнүүдэй бокс Олимпиин наадануудай программада 2012 ондо оруулагдаһан байна. Тэрэ гэһээр Наталья Шадрина Ородой суглуулагдамал командын бүридэлдэ оруулагдажа, Олимпиадада хабаадаха түсэбтэй. Теэд ямар бэ даа шалтагаанһаа һанаһандаа хүрөөгүй, - гэжэ Валерий Доржиев хөөрөөгөө эхилнэ.
“Номто” гэһэн тамирай клубай гэшүүн Токио ошохо аргатай байгаа. Теэд Улаан-Үдэ хотодо үнгэргэгдэһэн дэлхэйн чемпионадта шангай һуурида гаража шадаагүй.
- Наташада ехэ найдажа байгаабди. Дэлхэйн чемпионадай дүрбэлжэн финалай шатада диилдэхэдэнь, Ородой суглуулагдамал командын һоригшод ондоо басагадые туршажа үзөө. Тиигэжэ Екатерина Дынник һүүлшын Олимпиин наадануудта хабаадаа гээд һануулнаб, - гэжэ боксын хүтэлбэрилэгшэ хэлэнэ.
Мүнөө жэл Наталья Шадрина 31 наһа хүрэбэ. 2024 ондо үнгэргэгдэхэ Олимпиин наадануудай үедэ 34-тэй болохо. Валерий Доржиевай хэлэһээр, энэнь һаад ушаруулхагүй.
- Тамиршанай наһанай хаһа богони хэлсэдэг. Теэд энээниие арсажа, 30-һаа үлүү наһатайдаа диилэхэ ушарнууд олоор тохёолдоно. Токиодо болоһон Олимпиадада Финляндиин боксёр эхэнэр 41 наһатайдаа мүнгэн медаль абажа шадаа. Өөрөө Наталья бокс орхихоёо һананагүй. “Заал һаа Олимпиадада шалгархаб!” – гээд, урагшаа зүдхэнэл даа. Һоригшо Бато-Мунко Ванкеевэй нюдэн соонь галхан харагдана. Юуб гэхэдэ, өөрөө 2004 ондо Олимпиин наадануудта хабаадаашье һаа, бүхы һанаһан юумэеэ бэелүүлэйгүйб гэнэ. Тиимэһээ ондоо гүрэнэй түлөө мүрысэхэ һанаан бодол түрөө, - гэжэ Валерий Доржиев ойлгуулна.
Тус мүрысөөнэй удаа Наталья Шадрина Серби гүрэнэй суглуулагдамал командын бүридэлдэ оруулагдаа. Октябриин 25-һаа ноябриин 5 болотор үнгэргэгдэхэ дэлхэйн чемпионадта бэлэдхэл хэжэ эхилхэнь. Теэд чемпионадта тэрэ хабаадаха гү, али үгы гү гэжэ удангүй мэдэгдэхэ.
Буряадай үшөө нэгэ боксёр Тамир Галанов мүнөө үедэ Серби гүрэнэй чемпионадта хабаадаха гэжэ бэлдэжэ байнхай. Ринг дээрэ 54 килограммай шэгнүүртэ гараха түсэбтэй. Тамир хадаа Европын энэ гүрэнэй эрхэтэн болохо хүсэлэнтэй. Сербиин чемпион болобол, дэлхэйн чемпионадта шаасалдаха эрхэдэ хүртэхэ аргатай.
Автор: Бадма ЯКШЕЕВ
Фото: Анна Огородник
