​“Шатар - һургуулида!” гэһэн грантда Буряад Улас хүртэбэ

Ород гүрэнэй Шатарай федераци болон Елена ба Геннадий Тимченконүүдэй нигүүлэсхы сэдьхэлэй жаса үнинэй хамтын ажал ябуулна. “Шатар - һургуулида!” гэһэн федеральна түсэл тэдэ бэелүүлжэ эхилээд, тусхай грант шан зохёоһон байна. Буряад Улас болон Самарска можо шангуудта хүртэбэ гэһэн һайн мэдээн һаяхан дуулдаба.

Буряадай Шатарай федерациин хүтэлбэрилэгшэ, Арадай Хуралай һунгамал Инна Ивахиновагай мэдээсэһээр, 137 һургуулида түсэл бэелүүлэгдэхэ.

- Түсэлдэ орохынгоо урда бүхы аймагуудаар ябажа, шатарай талаар байра бадалыень шэнжэлжэ үзөөбди. Нэн түрүүн хэды һоригшод хүдэлнэб гэжэ тоолообди. Мүн аймагай болон уласай мүрысөөнүүдтэ хабаадаһан дүнгүүдыень шэнжэлээбди. Тиигэжэ 137 һуралсалай гуламта шэлэгдээ, - гэжэ Инна Ивахинова хөөрэнэ.

Түсэл бэелүүлхэ хүдөөгэй 9 аймагай болон Улаан-Үдэ хотын һургуулинуудта арба-арбан шатар, хюлгэ, часууд болон шатарай методическа заабаринууд, интерактивна самбар тараагдаха юм.

Эхэнэрнүүдэй дунда уласхоорондын гроссмейстерэй хэлэһээр, ерэхэ жэлдэ шатарай видеохэшээлнүүд буулгагдажа, шатар наадажа һураха дуратайшуулда тараагдаха. Энээниие бүтээхын тула, федерациин сайт һэльбэн шэнэлэгдэхээр хараалагданхай. Хэшээлнүүд ород, буряад хэлэнүүд дээрэ дурадхагдаха юм.