​Буряад угтай тамиршан Галсан Базаржапов дэлхэйн хэмжээндэ мүнгэн медальда хүртэбэ

Америкын Янктон хотодо түгэсэһэн дэлхэйн чемпионадта Ородой суглуулагдамал командын гэшүүд оройдоол нэгэ мүнгэн медаль абажа шадаа. Буряад угтай тамиршан Галсан Базаржапов суутай Елена Осиповатай хамта командна микст тоосоондо шалгараа.

Һур харбалгаар дэлхэйн чемпионат 51-дэхиеэ үнгэргэгдөө гээд хэлэлтэй. Коронавирусай һүжэрһэн сагта болоһон мүрысөөе онсолмоор. Юуб гэхэдэ, тус хэмжээ ябуулга түрүүн заагдаһан газартаа, тэрэл сагтаа эмхидхэгдээ. Бүхэдэлхэйн хэмжээнэй мүрысөөндэ хэдэн Буряадай тамиршад хабаадаһан байна. Эхэнэрнүүдэй дунда суглуулагдамал командын бүридэлдэ Инна Степанова болон Светлана Гомбоева гэгшэд оруулагдаа. Буряад угтай тамиршад Эрдэм Цыдыпов, Бэликто Цынгуев болон Галсан Базаржапов гэгшэд Ородой Һур харбалгын федерациие түлөөлөө. Блочно номо һуршаар харбалгын тулалдаануудта Виктория Бальжанова болон Виктор Калашников хоёр мүрысөөндэ хабаадаа.

Түрүү һуури эзэлхын түлөө шамдаһан 53 гүрэнэй 336 хабаадагшадай дунда буряад хүбүүд басагаднай яһала һайн дүнгүүдые харуулһан байна.

Калининградай 2019 оной дэлхэйн абарга Наталья Авдеева, 2021 оной Олимпиин наадануудай мүнгэн медальда хүртэгшэ Светлана Гомбоева гэгшэд хубиин тоосоондо шангай 6-дахи һуури эзэлээ. Галсан Базаржапов 8-дахи һуурида мүрысөө түгэсхөө.

Командна тоосоондо Ородой тамиршад бираагүй. Одоол найдал түрүүлжэ байһан эхэнэрнүүдэй команда түрүүшын уулзалгада Бразилиин тамиршадта 4:5 гэһэн тоотойгоор шүүгдэшөө.

Командна микст тоосоондо Ородой тамиршад хэдэн амжалтануудые туйлаад, финальна уулзалгада Урдахи Солонгосой тамиршадта шүүгдээд, мүнгэн медальда хүртөө. Ростовой можын Елена Осипова болон Үбэр Байгалай хизаарай Галсан Базаржапов гэгшэд харбажа, эрхимүүдэй дунда ороһон байна. Мүнөө жэлдэ Агын Буряадай тойрогой Зугаалай һууринһаа уг гарбалтай Галсан хэдэн мүрысөөнүүдтэ шангай һууринуудые эзэлээ. Мүн Олимпиин наадануудта хабаадаа. Хүнгэн бэшэ жэлэй түгэсхэлдэ дэлхэйн чемпионадта мүнгэн медаль абаһаниинь һайшаалтай.

Токиодо болоһон Олимпиин наадануудта гурбан алтан медаль абаһан 20 наһатай Урда Солонгосой тамиршан Ан Сан энэшье мүрысөөндэ шалгараа. Тэрэ командынгаа бүридэлдэ болон микст тоосоондо хоёр алтан медальда хүртөө. Харин хубиин тоосоондо шангай 3-дахи һуурида гараа. Тэрэ хахад финалай уулзалгада 17 наһатай США-гай тамиршан Кейси Кауфхолд гэгшэдэ шүүгдэшөө. Саашань Америкын харбагша амжалтаяа үргэлжэлүүлжэ шадаагүй, финалда Урда Солонгосой 22 наһатай Чжан Мин Ху гэгшэдэ диилдэһэн байна.

Сентябриин 29-30-ай үдэрнүүдтэ Янктон хотодо һур харбалгын һайндэр үргэлжэлхэнь. Эгээл эрхим тамиршад Дэлхэйн Кубогта хүртэхын түлөө финальна мүрысөөндэ хабаадаха. Тэрэ тоодо Буряадаймнай Светлана Гомбоева, Елена Осипова гэгшэд харбаха.