​Буряадай барилдаашанай үндэр амжалта

Эдэ үдэрнүүдтэ Норвеги гүрэнэй ниислэл болохо Осло хотодо барилдаагаар дэлхэйн чемпионат үнгэргэгдэжэ байнхай. Буряадаймнай барилдаашад Арсалан Будажапов, Евгений Жербаев гэгшэд хибэс дээрэ гаража, бэеэ туршаа. Һайн дүнтэй барилдаа харуулаа гээд абаһаар лэ хэлэхэ хэрэгтэй.

Үсэгэлдэр үдэшэ Евгений Жербаев 3-дахи шангай һууриин түлөө барилдажа, хүрэл медальда хүртөө. Буряадай тамиршан Евгений Жербаев үнгэрһэн хабар Улаан-Үдэдэ болоһон Ородой чемпионадта шалгараа бэлэй. Тиихэдэ тэрэ 2-дохи һуурида гараа һэн. Тиигэжэ Ородой суглуулагдамал командын бүридэлдэ оруулагдаа. Хэды тиигэбэшье, хэдэн барилдаашадые суглуулжа, туршалгын уулзалгануудые һоригшод үнгэргөө. Буряадаймнай тамиршан Давид Баев болон Исраэль Касумов гэгшэдые шүүжэ, дэлхэйн чемпионадта хабаадаха эрхэеэ хамгаалжа шадаа.

Осло хотодо Евгений Жербаев 70 килограммай шэгнүүртэ хибэс дээрэ гараа. Казахстанай Сырбаз Талгат гэгшые 10:1 гэһэн тоотойгоор түрүүшынгээ уулзалгада диилэжэ гараа. Удаань Монгол ороной Батмагнайн Батчулуунтай барилдаа. 9:0 гэһэн тоотойгоор шүүжэ байһан Евгений Монголой тамиршаниие нюргыень шоройдуулжа, туше дээрэ хэбтүүлээ. Хахад финалай уулзалгада Евгений Кыргызстанай түлөөлэгшэ Эрназар Акматалиевтай уулзаа. Анамана тулалдаһанай удаа шүүгшэд Кыргызстанай тамиршанай гарыень дээшэнь үргэбэ. 5:9 гэһэн тоотойгоор илалта туйлаһан Акматалиев финалда орожо, олон тоото мэргэжэлтэдые гайхуулаа.

Дэлхэйн чемпионадта Арсалан Будажапов түрүүшынхиеэ хабаадаа. Тэрэ Кыргызстан гүрэниие үнинэй түлөөлнэ гээд һануулая. 79 килограммай шэгнүүртэ Ород гүрэнэй барилдааша Радик Валиевтай уулзажа шүүгдэшөө. Теэд тэрэнь финалда орожо шадаагүй, хүрэл медаляар шагнагдаа. Дэлхэйн чемпионадай хоёр үдэрэй дүнгүүдээр Ород гүрэнэй түлөөлэгшэд табан медаль абаа гээд хэлэлтэй. Абасгаджи Магомедов болон Загир Шахиев алтан медальнуудта хүртөө. США-гай, Иранай гурба-гурбан тамиршад чемпионууд боложо тодороо. Монгол ороной хоёр тамиршан хүрэл медаляар шагнагдаа.

Буряад орониие түлөөлдэг чуваш угтай Вероника Чумикова мүнөөдэр, октябриин 6-да, хибэс дээрэ гараха. Тэрэ 57 килограммай шэгнүүртэ барилдаха.