​Шатараар хоёр мүрысөөн Буряад Уласта эмхидхэгдээ

Намарай эдэ үдэрнүүдтэ шатараар хоёр мүрысөөн Буряад Уластамнай эмхидхэгдэбэ. Тамиршад нюур нюураараа уулзаһандаа баяртайнууд. Юуб гэхэдэ, хахад жэл шахуу нэгэшье шанга тулалдаанууд болоогүй бшуу. Мүрысөөнүүд онлайн аргаар үнгэргэгдэдэг байгаа.

Үндэр наһатайшуул суглараа

Наһажаал зоной үдэртэй дашарамдуулан, ветерануудай дунда Буряад Уласай мүрысөөн эмхидхэгдэжэ, 38 тамиршадые суглуулаа.

- Хабаадагшад бүри олон байха һэн. Теэд ковид үбшэн манай олон тамирша нүхэдые абаашаа. Үшөө тиихэдэ вакцинаци хээгүй олон шатаршад байгаа. Эмнэлгын газар ошожо, ковидһаа тарилга абахыень бултандань дурадхаабди, - гэжэ шатарай наада эмхидхэһэн Владимир Агафонов тэмдэглэнэ.

Юһэн шатын удаа аяар гурбан хүн тон адли 7,5 очко абажа шадаа. Нэмэлтэ тоололгын удаа Баир Митыпов чемпионой нэрэ зэргэдэ хүртөө. Гусиноозёрск хотоһоо ерэһэн Анатолий Рушаков шангай 2-дохи һуурида гараа. Тарбагатайн Африкан Андреев хүрэл медальда хүртөө. Ивалгын аймагай Владимир Хорганов түрүүшүүлһээ оройдоол 0,5 оноо багаар абаа.

Эхэнэрнүүдэй дунда 80 наһатай Светлана Жеребцова дахин түрүүлжэ гараа.

- Компьютераар наадахада тад ондоо. Тэндэ түргөөр наадаха хэрэгтэй. Яһала һайн һурааб. Нюур нюураараа уулзабал дээрэ гээд һанагдана. Теэд шууяагүй газарта һурашоод байбалби. Ондоо хюлгэнүүд дээрэ шатаршадай хөөрэлдэхэдэнь, намда һаалта болоо, - гэжэ ветерануудай дунда оло дахин чемпион болоһон Светлана Жеребцова хэлэнэ.

Энэ мүрысөөндэ шалгарһан тамиршадые наһанай хэдэн бүлэгтэ хубаажа шагнаһан байна.

Эдиршүүлэй эрмэлзэл

Эдир шатаршад Буряад Уласай хэмжээнэй мүрысөөндэ уулзаба. 125 шатаршад наһанай дүрбэн бүлэгтэ мүрысөө.

Софья Унгаева, Артём Солдатов, Алдар Богданов, Татьяна Имыхелова, Номина Дармаева, Сойжина Комиссарова, Роман Грехов болон Тамерлан Чындыгыр гэгшэд өөр өөрын наһанай бүлэгүүдтэ түрүүлжэ гараа. Һүүлэй жэлнүүдтэ эдэ залуушуулай амжалтанууд тухай тамирта дуратайшуул оло дахин дуулаһан байха.

 Октябриин 30 – ноябриин 11-эй үдэрнүүдтэ Владивосток хотодо үнгэргэгдэхэ Алас Дурна зүгэй чемпионадта хабаадаха эрхэдэ түрүү һуури эзэлэгшэд хүртөө.