​Буряадай шатаршан Жамсаран Цыдыповэй эгээл ехэ амжалта

Долоон хоногой хугасаада Сочи хотодо түргэн шатараар болон блиц-нааданаар Ородой чемпионат эмхидхэгдээ. Буряадай гроссмейстер Жамсаран Цыдыпов нэгэ алтан болон хоёр мүнгэн медальнуудые тэндэ абажа, ялас гэмэ амжалта туйлаа гэхэдэ, алдуу болохогүй.

- Олон жэлдэ шатар нааданаб, уласхоорондын гроссмейстер боложо шадааб. Харин Ородой чемпионадта үшөө медальнуудые абажа үзөөгүй байгааб. Наһанаймни эгээл ехэ амжалта боложо үгэбэ гээшэ, - гэжэ Жамсаран Цыдыпов мэдүүлнэ.

Түрүүшын үдэрнүүдтэ хубиин тэмсээн үнгэргэгдөө. Блиц-нааданда Жамсаран оройдоол 39-дэхи һуурида гараа. Харин түргэн шатарай тулалдаануудта Буряадай шатаршан шалгараа. Аяар табан хүн тон адли 8,5 оноотой мүрысөөгөө түгэсхөө. Энэ ушарта Буряадай шатаршан шангай 2-дохи һуури эзэлжэ шадаа. Хальмаг Уласһаа уг гарбалтай Санан Сюгиров чемпионой нэрэ зэргэдэ хүртөө.

Удаадахи үдэрнүүдтэ командна тоосоон эмхидхэгдээ. Буряадай тамиршан Казань хотын “Ладья” командын түлөө эдэ мүрысөөнүүдтэ наадаа. Блиц-нааданай тулалдаануудта Татарстаниие түлөөлһэн команда чемпион боложо тодороо. Жамсаран Цыдыпов, Владислав Артемьев, Артём Тимофеев, Максим Самусенко болон Рамиль Файзрахманов гэгшэд алтан медальнуудаар шагнагдаа.

Түргэн шатарай мүрысөөндэ “Ладья” команда баһа амжалтатайгаар наадаһан байна. Москвагай суглуулагдамал командатай адли оноо абабашье, нэмэлтэ дүнгүүдые тоолоһоной удаа 2-дохи һуурида гараа.

Жамсаран Цыдыповһээ гадна Буряад орониие үшөө гурбан залуу тамиршад түлөөлһэн байна. Эгээл эдир ФИДЕ-гэй мастер Эрдэм Хубукшанов шанга тулалдаануудта оролсожо, хоёр медаль абажа шадаа. 14 наһа хүрөөдүй шатаршадай дунда блиц-нааданда тэрэ шангай 3-дахи һуури эзэлээ. Түргэн шатарай тулалдаануудта 15 наһа хүрөөдүй тамиршадай дунда түрүүлжэ гараа.

13 наһатай Номина Дармаева блиц-нааданда шалгараа. 15 наһа хүрөөгүй наадагшадай дунда 3-дахи һуурида гараһан байна.

Уржадэр Жамсаран Цыдыпов нютагаа бусаба. Мүн эдир шатаршаднай Сочи хотодо үлөө. Онлайн аргаар үнгэргэгдэжэ байһан Европын чемпионадта тэдэ хабаадана.