Суута һоригшын дурасхаал

«ХХ зуун жэлэй эрхим һоригшо» гэһэн алдар солодо хүртэһэн Дмитрий Георгиевич Миндиашвили Енисей мүрэнэй эрье дээрэ оршодог Красноярск хотодо олон жэлэй хугасаада хүдэлөө, гүрэн дотороо мэдээжэ барилдаашадые бэлдэһэн юм. Дмитрий Миндиашвили өөрын нэрэмжэтэ барилдаанай академи байгуулһан намтартай. Һүүлэй арбаад жэлдэ тус эмхиин шангуудта хүртэхын түлөө мүрысөөн олон тамиршадые суглуулдаг байгаа. Ушар гэхэдэ, эндэ түрүү һуури эзэлһэн барилдаашан «Гран-при Иван Ярыгин» гэһэн уласхоорондын мүрысөөндэ хабаадаха эрхэдэ хүртэдэг һэн. Һүүлшын иимэ мүрысөөн 2020 оной январь һарын эхиндэ эмхидхэгдээ.

2021 оной май һарада Дмитрий Георгиевич Миндиашвили наһа бараа гэжэ гашуудалтай мэдээсэл Красноярск хотоһоо ерээ һэн. Суута һоригшын шабинар, Красноярскын хизаарай Тамирай яаманай хүтэлбэрилэгшэд дары түргөөр саарһа дансануудые бэлдэжэ, Дмитрий Миндиашвилиин дурасхаалай бүхэроссиин түрүүшын мүрысөө эмхидхэхэ гэһэн шиидхэбэри абаа.

Энэ мүрысөөндэ 200 гаран тамиршад сугларһан байна. Тэдээн сооһоо Буряадай барилдаашад яһала һайн дүнгүүдые харуулаа. Эхэнэрнүүдэй дунда шанга тулалдаануудта зургаан медаль абажа шадаа. Залуу барилдаашад Дарима Санжиева болон Эржэма Жамсаранова гэгшэд чемпионууд боложо тодороо. Ульяна Тукуренова Алена Сангадиева хоёр мүнгэн медальнуудта хүртөө. Эрхүү можын Эхирид-]Булагадай аймагһаа уг гарбалтай, БГСХА-гай оюутан Кристина Тамразян өөрын шэгнүүртэ алтан медаляар шагнагдаа.

Мүн 2021 онһоо хойшо Буряад Уласые түлөөлдэг Красноярскһаа уг гарбалтай Динара Кудаева баһа түрүүлһэн байна. Буряадай эрэшүүл спортдо дуратайшуулые ганса хүрэл медальнуудаар баярлуулаа. Булат Батоев, Никита Жаргалов болон Алексей Боровицкий гэгшэд шангай 3-дахи һууринуудые эзэлээ