Январиин 26-һаа 30 болотор «Гран-При Иван Ярыгин» гэһэн уласхоорондын тэмсээн болохонь

Эхэнэрнүүдэй команда бүри январиин 2-һоо һорилгоёо эхилһэн байна. Зариманиинь Түнхэнэй аймагта бэлдэнэ, харин бэшэниинь эндээ ФСК соо һорилго гаранад.

• 2021 оной һүүл һарада олон тэмсээнүүд болоо. Ород Уласай кубогта хүртэхын түлөө урилдаанда хабаадаабди. Томо томо тэмсээнүүдтэ хабаадаха гэжэ ехэтэ хүлеэнэбди, – гэжэ Ород Уласай чемпионадай хоёр удаа абарга Алёна Сангадиева хэлэнэ.

Буряадай эгээл мэдээжэ тамиршан Стальвира Оршуш гэмэлтэһэн ушарһаа тус урилдаанда хабаадажа шадахагүй.

Харин эршүүлнай бэлдэлгынгээ хоёрдохи шата гаража байна.

• Түрүүшын шата Дагестан Уласта эхилээ һэн, удаань Дмитрий Миндиашвилиин нэрэмжэтэ тэмсээндэ хабаадаһан байнабди, - гэжэ Буряадай суглуулагдамал командын гол һоригшо Цыбик Максаров дуулгана.

Буряадаа түлөөлжэ, Алдар Бальжинимаев, Вениамин Жербаев, Жаргал Дамдинов, Даша Шарастепанов, Тамир Гармаев болон  Балдан Цыжипов гэгшэд барилдахань. Абарга бүхэнүүдтээ амжалта хүсэе!