Үбэлэй Олимпиада-Бээжэндэ

Һүүлшын найдал... Олимпиадада Буряадай түлөөлэгшэ ошохо гэһэн найдал һая болотор байгаа. Мухар-Шэбэрэй аймагай Сагаан-Нуур тосхонһоо уг гарбалтай Алиса Жамбалова олимпиин командын бүридэлдэ орожо шадаагүй. Энэ мэдээсэл Саян Владимирович һоригшонь дуулгажа, шалтагыень элирүүлээ.

- 2021 оной эхиндэ Алиса коронавируста дайруулаа. Хэды хүнгэнөөр үбдэбэшье, хойшолонгуудынь шанга байшоо. Мүнөөшье болотор урда жэлнүүдтэ харуулжа байһан дүнгүүдтээ хүрэнэгүйбди, - гэжэ Саян Владимирович хөөрөө һэн.

2022 оной Олимпиин наадануудта хабаадаха бэлэдхэл Алиса май һараһаа эхилһэн байна. Ородой суглуулагдамал командын бүридэлдэ оруулагдажа, немец мэргэжэлтэн Маркус Крамерай ударидалга доро зунай бэлэдхэлэй 7 шата гараа. Намарай һүүл багаар урилдаануудта хабаадахадаа, һайн дүн харуулжа шадаагүй. Энээнһээ уламжалан, Ородой командын һоригшод дэлхэйн Кубогта хүртэхын түлөө мүрысөөнэй шатануудта хабаадахыень абаагүй бшуу. Тиимэһээ Алиса Жамбалова бүхэроссиин хэмжээнэй мүрысөөнүүдтэ урилдажа, хэдэн медальнуудта хүртөө. Хэды иимэ амжалтануудые туйлабашье, урилдаануудта харуулһан сагынь муу гээд шэнжэлэгдээ. Алиса Жамбалова Олимпиадада ошохоёо болёоб гээд, уйдаад һуунагүй, урма зоригоо хухарнагүй. Мүрысөөнүүдтэ хабаадажал байна.

Үнгэрһэн долоон хоногой эсэстэ Ородой Кубогта хүртэхын түлөө 4-дэхи шатада мүнгэн болон хүрэл медальнуудта хүртөө. Һонирхолтойнь гэхэдэ, Алисын эндэ харуулһан саг яһала һайн гээд тоологдоо. Заал һаа Олимпиин наадануудта ошохоб, эгээл энэ үедэ өөрынгөө һайн дүн харуулжа эхилхэб гэжэ бэеэ бэлдэһэниинь гаража байна гү даа. Санаар урилдаагаар Ородой суглуулагдамал командын һоригшод угаа эртэ Олимпиадада хабаадагшадай нэрэ тодоруулаа гээд һанагдана. Буряадай түлөөлэгшэ Бээжэн заал һаа ошохо гээд дуулгая. Энэ хэн бэ гэбэл, Батор Норбоев болоно. Табан жэлэй хугасаада тэрэ санаар урилдаагаар суглуулагдамал командын бүридэлдэ массажистын мэргэжэлээр амжалтатай хүдэлнэ. Энэшье удаа санашадые бэлэдхэлгэдэ хабаадалсана.

 Ородой тамиршад өөдэлхэ гү?

2018 ондо үнгэргэгдэһэн үбэлэй Олимпиин наадануудта Алиса Жамбалова хабаадаа бэлэй гээд һануулая. Тиихэдэ тэрэ гурбан урилдаанай дүнгүүдээр эрхим 10- ай тоодо орожо шадаагүй. Урда Солонгосой Пхенчхань хотодо үнгэргэгдэһэн наадануудта Ород гүрэнэй тамиршад 2 алтан, 6 мүнгэн ба 9 хүрэл медаль абаа һэн. Тиигэжэ тэдэ командна тоосоондо аяар 13-дахи һуурида гараа.

Мүнөө жэлдэ Ородой тамиршад энэ дүн һайжаруулха түсэбтэй. Манай тамиршадай һүүлшын дүнгүүд ехэ найдал түрүүлнэ. Биатлон, санаар урилдаан, фигурна һолжоролго, шайбатай хоккей, скелетон, конькигаар урилдаан гэхэ мэтэ зүйлнүүдээр Ород гүрэнэй тамиршад медальнуудые абаха аргатай гээд мэргэжэлтэд түсэблэнэ. Санаар урилдаанда Александр Большунов, Наталья Непряева, биатлондо - Александр Логинов, Кристина Резцова, сноубордоор - Дмитрий Логинов, фристайлда - Максим Буров, конькигаар урилдаанда - Ангелина Голикова, Павел Кулижников, шорт-тректэ - Семён Елистратов, Софья Просвирнова гэгшэд түрүүлжэ гараха гээд һанагдана. Фигурна һолжоролгодо Ородой тамиршад бүхы медальнуудые абахаар бэлэн байһанаа һая дүүрэһэн Европын чемпионадта харуулаа. Бээжэндэ тамиршад спортын 15 зүйлдэ 109 медалиин түлөө тэмсэхэ. 95 гүрэнэй 4 мянга гаран тамиршад мүрысөөнүүдтэ хабаадаха гээд хэлэхэ хэрэгтэй.