Шанга тулалдаанууд

Бокс

Буряад Уласта гурбан томо мүрысөөн 2022 ондо үнгэргэгдэхөөр хараалагдана. Олимпиин абарга Владимир Сафронов, Олимпиин наадануудай мүнгэн медальда хүртэһэн Виликтон Баранников гэгшэдэй мүнхэ дурасхаалда зорюулагдаһан заншалта бүхэроссиин мүрысөөн эмхидхэгдэхэ. Мүнөө жэл тус хэмжээ ябуулга июниин 27 – июлиин 3-ай үдэрнүүдтэ болохо.

Эдир боксёр басагад Улаан-Үдэ хотодо бүхы Ород гүрэнһөө сугларха. 15- 16 ба 13-14 наһатайшуулай дунда Ородой чемпионат Буряадай ниислэлдэ мартын 12-20-до үнгэргэгдэхэнь. Эдэ наһанай бүлэгүүдтэ Ородой суглуулагдамал команда бүридхэгдэжэ, Итали болон Турцида үнгэргэгдэхэ Европын чемпионадуудта хабаадаха эрхэдэ хүртэхэ юм.

Зунай хаһада боксоор бэеэ һоридог эхэнэрнүүд дахин Улаан-Үдэ ерэхэ. Юуб гэхэдэ, июлиин 21-31-эй үдэрнүүдтэ ехэшүүлэй дунда Европын чемпионат хараалагданхай.

- Европын болон уласхоорондын боксын федерацинууд Буряадта иимэ ехэ хэмжээ ябуулга үнгэргэхэ гэһэн шиидхэбэри абаһан байна. 2019 ондо дэлхэйн чемпионат эмхидхэһыемнай һайнаар тэдэ һанана. Баһа тиимэ шадамар бэрхээр үнгэргэхэ гэжэ оролдохобди. Ородой суглуулагдамал командын түлөө Буряадаймнай хэдэн басагад гаража, амжалта туйлаха бэзэ гээд найдагдана, - гэжэ Буряадай Боксын федерациин хүтэлбэрилэгшэ Валерий Доржиев хэлэнэ.

Боксоор ехэ мүрысөөнүүд хүршэ хотонуудта болохоор хүлеэгдэнэ. Майн 8-15-ай үдэрнүүдтэ 17-18 наһатай эдиршүүлэй дунда Ородой чемпионат Эрхүү хотодо үнгэрхэ. Сентябриин 15-25-ай үдэрнүүдтэ Шэтэ хотодо эрэшүүлэй дунда Ородой чемпионат болохо гээд мэдүүлнэбди.

Тайска бокс

1990-ээд онуудай һүүл багаар Буряад Уласта зүүн зүгэй тулалдаанууд хүгжэһэн байгаа. Кикбоксинг, ушу, тайска бокс болон бусад зүйлнүүдээр тамиршаднай тон ехэ амжалтануудые туйлаа. Удангүй хэдэн тулалдаануудта, илангаяа тайска боксдо һонирхол буураа. Хэды тиигэбэшье дуратайшуул һорилгоёо үргэлжэлүүлжэ, ерээдүйн тамиршадые һэмээхэн бэлдэжэ байгаа. Һүүлэй хэдэн жэлдэ Буряадай тайска боксёрнууд хэдэн амжалтануудта бүхэроссиин болон уласхоорондын мүрысөөнүүдтэ хүртөө.

Улаан-Үдэдэ эдиршүүлэй дунда Ородой чемпионат 2019 ондо болоо һэн. Харин мүнөө жэлдэ ехэшүүлэй дунда Ородой мүрысөөн Буряадай ниислэлдэ эмхидхэгдэхэнь. Тус хэмжээн мартын 22-28-ай үдэрнүүдтэ түсэблэгдөө.