Ород гүрэн дотор түрүүлээ

Эндэ Буряадай тамиршад гурбан медальда хүртэһэн байна. Буряад Уласай мэдээжэ һоригшо Цыденбал Цыренжаповай хэлэһээр, Ородой хоёр чемпионат ээлжэлэн үнгэргэгдэхэнь. Шалтагааниинь гэхэдэ, февралиин һүүл багаар эмхидхэгдэхэ дэлхэйн чемпионадта бэлэдхэл болоно. Түрүүшын мүрысөөндэ тамиршад 50 метр зайда харбаа. Гол шангуудай түлөө 19 можо хизаарай 70 гаран тамиршад мүрысэһэн байна. Командна микст тоосоондо Буряадай харбагшад алтан медальда хүртөө. Баир Шигаев Татьяна Андриевская хоёр Башкортостанай болон Московско можын командануудые илажа гараад, түрүү һуури эзэлээ. Хубиин тоосоондо Татьяна Андриевская чемпион боложо тодороо. Финальна уулзалгада тэрэ Московско можын түлөөлэгшэ Анастасия Джиоевае оройдоол нэгэ очко үлүүгээр шүүгээ – 143:142. Түгэсхэлэй шатада Баир Шигаев Саха (Яхад) Уласай түлөөлэгшэ Виктор Скрыбкиндэ 146:147 гэһэн тоотойгоор шүүгдээ. Тиигэжэ Баир шангай 2-дохи һуури эзэлбэ гээшэ. Александр Гомбожапов Сергей Хутаков хоёр 4-дэхи һууринуудые эзэлээ гээд хэлэлтэй. Мүнөөдэр, январиин 19-дэ, эхилхэ ээлжээтэ мүрысөөндэ тамиршад 18 метрһээ харбаха юм. Эдэ хоёр мүрысөөндэ шалгарагшад Турци ошохо. Дубаи хотодо болохо дэлхэйн чемпионадта һүүлшын бэлэдхэл тэндэ үнгэргэгдэхэ гээшэ.