Үбэлэй халаан түлэг дундаа

3D харбалга

Арад зоной заншалта номо һурша харбалгаар хоёр мүрысөөн олоной анхарал татаа. Хэдэн жэлэй саана иимэ хэмжээ ябуулгануудай үедэ тамиршад буряад гуримаар харбажа туршаһан байна гээд һануулая. Теэд энээнһээ саашаа хэрэг ябанагүй. Ганса дасан дугануудай найр наадануудта тамиршад мүрысэнэ.

- Манай спортын зүйлөөр федерациин Кубогай түлөө болон Ородой чемпионадта 3D харбалгаар мүрысөөнүүд эмхидхэгдэбэ гээшэ. Элдэб янзын түхэлэй номо һуршаар харбадаг тамиршад тэмсээ. Эдэмнай юрын хүнүүдэй өөрын гараар бүтээһэн һур номшо болоно гээшэ. Харбалгада нэгэшье оньһон техникэ, оптико хэрэглэгдэнэгүй. Үбэлдөө 18 метр зайда тамиршад харбадаг юм, - гэжэ Буряадай суглуулагдамал командын гэшүүн Елена Николаева хөөрэһэн байна.

Эдэ мүрысөөнүүдтэ 28 можо хизаарай 150 гаран тамиршад хабаадаа. Дагестан, Хальмаг Уласуудай түлөөлэгшэд олоор ерээ. Һур харбалгын Ородой федерациин Кубогта хүртэхын түлөө мүрысөөндэ Буряадай тамиршад дүрбэн медаль шүүгээ. Баирта Гармаев “составной” түхэлэй номо һуршаар харбаад, чемпионой нэрэ зэргэдэ хүртөө. Ута (длинный) номо һуршаар харбаһан Надежда Харитонова өөрын бүлэгтэ түрүүшын һуури эзэлбэ. Александр Цыренов (классическа номо һурша), Нима Жапов (периферийнэ номо һурша) гэгшэд шангай 2-дохи һууринуудые эзэлээ. Ородой чемпионадай үедэ ганса Надежда Харитонова урдахи амжалтаяа дабтажа шадаа. Энэ удаа тэрэ Санкт-Петербург хотын түлөөлэгшые илажа гараһан байна. Энээгээр 3D харбалгаар мүрысөөнүүд түгэсэбэ. Буряадай харбаашадай зунай мүрысөөнүүдтэ ошохо үгынь үшөө мэдэгдэнэгүй. Харин нютагаймнай тамиршад буряад гуримаар харбалгын тулалдаануудтаа бэлдэжэ эхилбэ. Сагаан һарын һайндэртэ зорюулагдаһан хэмжээ ябуулганууд болюу[1]лагдахагүй бэзэ гээд найдаг[1]дана.

Эрэмдэг бэетэйшүүл эрхимлэнэ

 Хойно хойноһоо хоёр дахин болоһон Ородой чемпионат тухай мэдээсэл урда дугаартаа үгөө һэмди. Эдэ мүрысөөнүүдтэ Ородой суглуулагдамал командын бүридэлдэ шэнээр шэлэн абалга болоһон байна. Февраль һарын һүүл багаар тэдэ дэлхэйн чемпионадта хабаа[1]дахаяа ошохо юм. 18 метр зайда харбаһан тэмсээнүүдэй дүнгөөр Буряадай команда зургаан медаль абажа шадаа. Блочно номо һуршаар харбадаг Буряадай суглуулагдамал команда (Александр Гомбожапов, Бадма Хаминдаев, Баир Шигаев) алтан медаляар шагнагдаа. Буряадай микст-команда (Даши Должина, Сергей Хутаков) мүн лэ чемпионой нэрэ зэргэдэ хүртөө.

 - Ородой чемпионадуудта шалгарһан Баир Шигаев, Татьяна Андриевская гэгшэд Дубай хотодо үнгэргэгдэхэ дэлхэйн чемпионадта ошохо болоо. Энэ ехэ мүрысөөндэ Александр Гомбожаповые хаража үзэхэ тухай шиидхэбэри Ородой һоригшод абаа. Манай Буряадай бусадшье тамиршад тиишээ ошожо магадгүй, - гэжэ уласай адаптивна тамирай һургуулиин мэргэжэлтэн Виктория Номоконова мэдүүлээ.

Европын мүрысөөндэ ошохын түлөө

 Элүүр энхэ харбаашад үбэлэй халаанай гол мүрысөөндэ бэлдэжэ байнхай. Словени гүрэнэй Ласко хотодо Европын чемпионадта хэн ошохоб гэжэ тэдэ хоёр мүрысөөндэ элирүүлнэ. Ородой Кубогта хүртэхын түлөө тэмсээндэ Буряадай тамиршад гурбан медаль абаһан байна. Буряадай гүрэнэй хүдөө ажахын академиин оюутан Эрдэм Цыдыпов түрүүлжэ гараа. Блочно номо һуршаар харбалгада Буряадаймнай хоёр тамиршад финалда гаража шадаа. Эндэ Сергей Шенхоров Сергей Калгин гэгшые шүүһэн байна. Январиин 23-да эхилһэн Ородой чемпионат мүнөөдэр түгэсэжэ, Ород гүрэнэй суглуулагдамал команда хүсэд бүридхэгдэхэ. Харин үглөөдэр залуушуулай хоёр наһанай бүлэгтэ бүхэроссиин  мүрысөөн эхиеэ абаха.