Тамирай тобшо һонинууд

Санаар урилдаан

Южно-Сахалинск. Ородой һурагшадай Спартакиада эхиеэ абаба. Алас Дурна зүгэй федеральна тойрогой санашад Сахалинай можодо уулзаба. Эндэ үнгэргэгдэһэн дүрбэн урилдаанда Буряадай басагад шалгараа. Буряадай багшанарай колледжын оюутан, Гусиноозёрск хотоһоо уг гарбалтай Виктория Невьянцева хоёр мүнгэн болон хүрэл медальнуудта хүртэһэн байна. Эстафетнэ урилдаанда Буряадай суглуулагдамал команда шангай 3-дахи һуури эзэлээ. Татьяна Ивченко, Маргарита Самарцева-Кузницына, Виолетта Большакова болон Виктория Невьянцева гэгшэд нютагаа түлөөлөө.

Хүнгэн атлетикэ

Томск.

Бүхэроссиин мүрысөөндэ Хурамхаанай аймагай Михаил Зверьков шангай һуури эзэлжэ шадаа. Һоригшо Евгений Дашиевай шаби “Газпром трансгаз Томск” гэһэн ООО-гой шанда хүртөө. Хоёр үдэрэй туршада хабаадагшад өөр өөрын бүлэгтэ гурбан зүйлөөр мүрысөө. Удаань бүхы дүнгүүдынь согсологдожо, түрүүшүүл элирүүлэгдээ. 60 болон 600 метрэй зайда урилдаанда, утада һүрэлгэдэ Михаил һайн дүн харуулжа, Омск, Томск, Новосибирск, Красноярск болон бусад томо хотонуудай тамиршадай урда гараа.

 Баскетбол

Улаан-Үдэ. Үхибүүдэй табан наһанай бүлэгүүдтэ Ородой чемпионат үнгэргэгдэнэ. Тус хэмжээ ябуулга хэдэн шатаһаа бүридэнэ гээд хэлэлтэй. Наадануудай хоёрдохи шатада Буряадай зургаан команда оронхой. Үнгэрһэн долоон хоногой эсэстэ 2009 оной басагад 2-дохи шатаяа түгэсэбэ. Улаан-Үдэ хотын тамирай 5-дахи һургуулиин шабинар ганса Белгородско можын Губкин хотын командые илаад, дүрбэ дахин шүүгдээ. Тиимэһээ тэдэ удаадахи шатада гаража шадабагүй. Эдэ үдэрнүүдтэ үнгэргэгдэжэ байһан 2-дохи шатын наадануудта 2006 оной басагад, 2009 оной хүбүүд хабаадана. Буряадай үшөө гурбан команда өөр өөрын наһанай бүлэгүүдтэ чемпионадай 3-дахи шатада гаража шадаа. Тэдэ февраль соо дахин мүрысэхэ.

Шэрээгэй теннис Уссурийск (Приморско хизаар).

Алас Дурна зүгэй федеральна тойрогой чемпионадта Буряадай тамиршад һайн дүн харуулба. Эрэшүүлэй дунда шанга тулалдаануудта Буряадай тамиршад 2-дохи командна һуури эзэлээ.