Наталья Шадринагай ээлжээтэ амжалта

Заншалта ёһоороо жэлэй эхиндэ түрүүшын мүрысөөн Серби гүрэндэ болоһон байна. Сомбор хотодо болоһон “Кубок наций” гэһэн хэмжээ ябуулгада ганса эхэнэрнүүд хабаададаг юм. Энэшье удаа наһанай дүрбэн бүлэгтэ 18 гүрэнэй 147 хүн суглараа. Үнгэрһэн намар Сербиин чемпионой нэрэ зэргэдэ хүртэһэн Наталья Шадрина дэлхэйн чемпионадта хабаадахаяа бэлдэжэ байнхай. Тиимэһээ тэрэ дахинаа 60 килограммай шэгнүүртэ ринг дээрэ гараа. Тус мүрысөөндэ тамиршан Босния Герцеговина, Греци болон Казахстанай түлөөлэгшэдые диилэжэ, чемпионой нэрэ зэргэдэ хүртэбэ. Наталья Шадрина хэды Сербиин түлөө шаасалдабашье, һорилгоёо “Номто” гэһэн тамирай клубай дэргэдэ мэдээжэ тамиршан, һоригшо Бато-Мүнхэ Ванкеевэй ударидалга доро үргэлжэлүүлһээр. Ородой суглуулагдамал командын гэшүүд Сомбор хотодо эгээл олон медальнуудые абажа шадаа. Буряадаймнай гурбан тамирша басагад шангай 3-дахи һуурида гараа. Эдэ хэд бэ гэбэл, Байра Аюшеева, Татьяна Сотникова болон Дарья Пантелеева болоно. Дэлхэйн чемпионат 2021 ондо үнгэргэгдэхэ байһан аад, хэдэн дахин болзорынь саашалуулагдаа. Мүнөө май соо Турцида эмхидхэгдэхэ гээд хараалагдана. Удаань эхэнэрнүүдэй дунда Европын чемпионат июль һарын һүүл багаар Улаан-Үдэдэ болохо гээд дуулгаа һэмди.