Түрүүшүүлэй тоодо бусалга

Январиин 27-30 үдэрнүүдтэ болоһон шанга тулалдаануудта 13 гүрэнэй 336 барилдаашад хабаадаһан байна. Олоной хабаадалгатай мүрысөөндэ Буряадаймнай тамиршад нэгэ алтан, хоёр мүнгэн медаль абаһаниинь һайшаалтай. Ирина Ологонова түрүүшүүлэй тоодо дахяад нэрлэгдэбэ. Декабрь һарада тэрэ Ородой Кубок шүүгээ бэлэй. Мүн Красноярскда Ирина чемпионой нэрэ зэргэдэ хүртөө. 55 килограммай шэгнүүртэ Казахстанай, Монголой болон Ородой барилдаашадые шүүһэн байна. - Аяар холын 2015 ондо эндэ илалта туйлаа һэм. Хэдэн жэл болоод дахин шүүхэдэ, гоё байна. Үнэхөөрөө, һонирхолтой мүрысөөн мүнөө жэл болоо. Юуб гэхэдэ, олон хари гүрэнүүдэй тамиршад эндэ ерээ гээшэ. Тэдэнээр барилдажа, бэеэ одоошье туршабаб, - гэжэ Ирина Ологонова финалай һүүлдэ һанамжаараа хубаалдаа. Жаргалма Цыремпилова (Цыренова) 2021 ондо тус мүрысөөндэ түрүүлжэ гараа һэн. Энэшье удаа нёдонойнгоо амжалта дабтахаар бэлэн байгаа. Ородой хоёр тамиршадые бэлэхэнээр диилээд, финалда Азербайджанай түлөөлэгшэ Алёна Колесниктэ шүүгдэшөө. Тиигэжэ тэрэ 59 килограммай шэгнүүртэ мүнгэн медаляар шагнагдаа. Һүүлэй хэдэн жэлдэ Буряад Уласые түлөөлдэг чуваш угтай Вероника Чумикова шангай 3-дахи һуури эзэлээ. Усть-Ордын тойрогһоо уг гарбалтай Фёдор Балтуев хэды залуушье һаа, һайн барилдаа харуулжа, мүнгэн медаль абаһан байна. 61 килограммай шэгнүүртэ тэрэ дүрбэн уулзалга үнгэргөө. Хахад финалай һүүлшын секундануудай үедэ добтолго хэжэ, Кыргызстанай тамиршание шүүгээ. Дэлхэйн болон Европын абарга Абасгаджи Магомедовтай финальна уулзалгада ана-мана тулалдажа, оройдоол нэгэ очко дүутуу абаад, шүүгдэһэн байна. Олон мэргэжэлтэдэй тэмдэглэһээр, Фёдор илаха һэн, теэд, шүүгшэд буруу шиидхэбэри абаа. Хэды тиигэбэшье, залуушуулай дунда үшөө барилдаха аргатай тамиршан ехэшүүлэй дунда иимэ үндэр амжалта туйлаба гээшэ. Эрэшүүлэй дунда мүрысөөндэ Дагестан болон Хойто Осети-Алания Уласуудай гурба-гурбан тамиршан түрүүлжэ гараа. Саха-Яхад Уласай, Москва ба Санкт-Петербург хотонуудай түлөөлэгшэд өөр өөрын шэгнүүртэ чемпионууд боложо тодороо. Хари гүрэнэй тамиршад сооһоо ганса США-гай Олимпиин наадануудай абарга Кайл Снайдер 1-дэхи һуури эзэлээ. Эхэнэрнүүдэй дунда тулалдаануудта Ород гүрэнэй дүрбэн басагад, тэрэ тоодо Ирина Ологонова шалгараа. США-гай болон Монголой түлөөлэгшэд хоёр-хоёр чемпионуудтай. Казахстанай, Азербайджанай барилдаашад нэгэ-нэгэ алтан медальтай гэртээ бусаа. Гэхэтэй хамта, Монголой суглуулагдамал команда бүхы дээрээ 14 медаль абаа. Тус мүрысөөндэ шалгарһан Ородой тамиршад Европын чемпионадта хабаадаха эрхэдэ хүртөө.