Буряадаймнай тамиршан Барнаулда наншалдаад шүүжэ гараа

Тэрэ Таджикистанай Джумабек Гаюровтай  тэмсэхэдээ  илажа гараба. OPEN FC  гээшэ ММА-гай мэргэжэлтэ лига болоно, энэ зүйлдэ дуратай бүхы дэлхэйн  тамиршадые нэгэдүүлдэг.

• Минии ана- мана шаасалдажа байхада һанаагаа зобожо байһан, намда этигэһэн зондо баяраа мэдүүлнэб. Үшөө тиихэдэ урилдаанда хабаадахадамни туһалһан нүхэдтөө халуун баяр хүргэнэб. Урагшаа дабшахабди!!! Урдамни үшөө олон тулалдаанууд, - гэжэ тамиршан өөрынгөө Instagram хуудаһанда бэшэһэн байна.

Хүн зон урда сагһаа хойшо гар тулалдаануудые хараха ехэ дуратай юм. Хэдэн мянгаад жэлэй саана эрэшүүл олоной урда гаража наншалдадаг байһан. Египедтэ, Римдэ эмхидхэгдэдэг байһан гар тулалдаанууд мүнөөнэй бокс, мма-худхамал барилдаан  гэһэн тамирай зүйлнүүдэй  эхин гэжэ тоолохоор. Дүхэригтэ наншалдахаяа гараһан хоёр тамиршанай нэгэниинь лэ амиды үлэдэг һэн. Тэндэһээ хоёр хүлөөрөө буухаш, үгы гэбэл шэрүүлжэ хаюулхаш. Хүнэй ами наһаяа үгэхэ бэлэн шаасалдажа байхадаш,  бусад зон хаража баярладаг саг байгаал даа.