Тобшо һонинууд

Бокс

Шэтэ. Буряадай суута тамиршан, боксоор дэлхэйн абарга Александр Бахтинай шангуудта хүртэхын түлөө бүхэроссиин мүрысөөн Шэтэ хотодо түгэсэбэ. Табадахияа боложо байһан хэмжээ ябуулгада 70 гаран тамиршан хабаадаба. Эндэ Буряадаймнай боксёрнууд хоёр медальда хүртөө. 63,5 килограммай шэгнүүртэ Александр Гындунов түрүүлжэ гараа. Вадим Лубсанов 71 килограммай шэгнүүртэ хүрэл медаляар шагнагдаа. Шэтэ хотодо намартаа эрэшүүлэй дунда Ородой чемпионат үнгэргэгдэхөөр хараалагданхай. Тус хэмжээ ябуулга бэлэдхэлгын шата боложо үгөө гэхэдэ, алдуу болохогүй.

Санаар урилдаан

 Красногорск. Буряадай санашан Алиса Жамбалова Ородой Кубогта хүртэхын түлөө мүрысөөнэй финалда болон Ородой чемпионадта бэлдэжэ байнхай. Ород гүрэн дотороо эгээл томо хоёр тэмсээндэ һайн дүн харуулбал, 2022- 2023 онуудай халаанда Ородой суглуулагдамал командын бүридэлдэ оруулагдаха аргатай. Февралиин 11-13-ай үдэрнүүдтэ “Кубок Восточной Сибири FIS” гэһэн мүрысөөндэ Алиса Жамбалова шангай 2-дохи һуури эзэлээ. 10 километрэй урилдаанда Буряадай тамиршан ганса Тюмень хотын түлөөлэгшэ Екатерина Смирновада шүүгдээ. Спринт урилдаанда Алиса 5-дахи дүн харуулһан байна.

 Футбол

Долгопрудный (Московско можо). 34 наһатай Буряадай наадагша Владимир Гранат “Олимп-Долгопрудный” командын бүридэлдэ ерэхэ хабараа үнгэргэхэ. Тус команда Ородой чемпионадай “ФНЛ» гэжэ нэрлэгдэһэн 1-дэхи лигэдэ наададаг юм. 2021 ондо Владимир Долгопрудный хотын түлөө наадажа туршаһан юм. 2-дохи лигэдэ түрүүлжэ гараһандань, Буряадай футболистын аша габьяа бага бэшэ. Мүнөө үедэ “Олимп-Долгопрудный” ФНЛ-дэ 29 очко абаад, 15-дахи һуури эзэлнэ. Мүрысөөнэй нааданууд мартын 6-да үргэлжэлхэ.

 Улаан-Үдэ.

2021 ондо Ородой футбольно хороон гүрэн дотороо эдиршүүлэй дунда шэнэ мүрысөө зохёожо, баруун зүгэй болон Алас Дурна зүгэй можо хизаарнуудта түрүүшын наадануудые эмхидхээ. Мүнөө жэлһээ тэндэ Буряадай команданууд наадахань. Буряадаймнай футболистнууд түрүүн “Сибирь” бүлгэмдэ оролсохо түсэбтэй байгаа. Харин РФС энэ үүргыень дэмжээгүй. Алас Дурна зүгэй командануудтай наадаха гэһэн шиидхэбэри абтаа. Хабаровск, Шэтэ, Владивосток, Уссурийск, Благовещенск, Комсомольск-на-Амуре, Находка, Южно-Сахалинск, Якутск, Петропавловск-Камчатский, Белогорск хотонуудай үетэнөөрөө тэдэ наадаха. Нааданууд майн эхинһээ октябрь болотор үнгэргэгдэхөөр хараалагданхай.

Шайбатай хоккей

Улаан-Үдэ. Ородой Юрэнхылэгшэ Владимир Путинай үүсхэлээр байгуулагдаһан хоккейнэ лигын һүниин нааданууд Буряад Уласта үнгэргэгдэнэ. 40-һөө дээшэ наһатай тамиршадһаа бүридэһэн 6 команда мүрысөөндэ хабаадана. Кабанскын, Загарайн аймагуудые болон Улаан-Үдэ хотые тэдэ түлөөлнэ. 11 нааданай удаа “Союз” болон “Дорожник” гэһэн команданууд адли 20 очко абажа, түрүүлжэ ябана. Мартын 12-то эдэ хоёр бэе бэетэеэ наадажа, хэниинь Сочи хотодо болохо Ородой финальна шатада хабаадахаб гэжэ элирүүлхэ.

Кикбоксинг

 Красноярск. 20-дохиёо үнгэргэгдэһэн Сибириин Кубогта хүртэхын түлөө мүрысөөндэ Буряадай тамиршад һайн дүнгүүдые харуулжа шадаа. Бүхы дээрээ тэдэ долоон медальда хүртөө. 2007-2009 оной тамиршадай дунда Дарина Смирнова “Поинтфайтинг” ба “Лайт контакт” гэһэн шэглэлнүүдээр шалгаржа, хоёр дахин чемпион боложо тодороо. 2008-2009 онуудай басагадай дунда Захааминай аймагай Динара Цыренова 44 килограммай шэгнүүртэ түрүүлжэ гараа. 2021 ондо Динара Ородой чемпионадта шангай 3-дахи һуури эзэлээ