Мэргэшүүл суглараа

Буряад Уласта буудалгын томо тир 2017 ондо нээгдэжэ, олон тоото спортдо дуратайшуулые баярлуулаа һэн. Буряадаймнай буудагшад эндэ дуратайгаар һорилго хэжэ, мүрысөөнүүдтэ хабаадажа эхилээ. Шэнэ тир соо бүхэроссиин хэмжээнэй хоёр мүрысөөн жэлэй хугасаада эмхидхэгдэдэг болоо. Бүришье томо мүрысөөнүүдые үнгэргэлгэ эндэ хараалагдаһан байгаа. Ородой түрүү тамиршад эндэ һорилго гарахаяашье түсэблэһэн юм. Теэд барилгын талаар алдуу хэгдээ. Юуб гэхэдэ, талын уһанай хөөрэжэ гараха ушар хараадаа абангүй барилга хэгдэһэниинь харамтай. Һүүлэй хоёр жэлдэ зунай хаһада тир соо уһан тогтожо, үнэтэй сэнтэй оньһон техникэ һалажа эхилэнхэй.

Ородой Кубок хэдэн шатаһаа бүридэнэ. Нэгэ мүрысөөень Улаан-Үдэдэ үнгэргэжэ байһаниинь һайшаалтай. Хабаадагшадай дунда суутай тамиршад ерэжэ, Буряадаймнай ургажа ябаа тамиршадтай уулзана. Тэдэ һонирхолтой зугаа дэлгээ. Хажуугаарнь өөһэдөө мүрысөөндэ хабаадана. Эрхүү хотын Артём Черноусов Токиодо болоһон Олимпиин наадануудта мүнгэн медальда хүртэһэн юм. Буряадай ниислэлдэ тэрэ наһанайнгаа нүхэр Маргарита Черноусоватай ерээ. Маргарита хадаа баһа бэрхэ буудагша, Олимпиадада хабаадаһан намтартай. Тэрэ дэлхэйн чемпионадай хүрэл медаль абаһан байна. Красноярскһаа уг гарбалтай Юлия Зыкова нёдондо жэл Токиодо мүнгэн медаляар шагнагдаа һэн. Эдэ гурбан Кубогта хабаадажа, олоной анхарал татана. Пистоледээр 10 метрэй зайда буудалгада Артём Черноусов бусадһаа мэргэнээр буудажа, түрүүшын алтан медальда хүртэбэ. Буряадай залуу тамиршад Игорь Каратуев болон Вячеслав Перелыгин шангай һууринуудые эзэлээ. Мүрысөөн мартын 19-дэ түгэсэхэ.