735
Дээрэ нэрлэгдэһэн мүрысөөндэ 17 наһа хүрөөдүй тамиршад хибэс дээрэ гараа. Хэжэнгэһээ уг гарбалтай, Улаан-Үдын 52-дохи һургуулиин шаби Аяна Цыренжапова 53 килограммай шэгнүүртэ барилдаа. Энэ шэгнүүр бусадһаа эгээл олон хабаадагшатай байшоо. Аяар 34 хүн тэмсээ.
Аяна табан уулзалга үнгэргөө. Брянск, Оренбург ба Челябинск хотонуудай тамиршадые бэлэхэнээр тэрэ нюрган дээрэнь хэбтүүлээ. Хахад финалай уулзалгада Дагестан Уласай Екатерина Чикановатай ана-мана тулалсабашье, диилэжэ гараа. Финалда Санкт-Петербург хотын Глафира Степанова гэгшые шүүжэ шадаагүй, шангай 2-дохи һуури эзэлжэ, мүнгэн медаляар шагнагдаа.
Ургажа ябаа залуу һоригшод Вандан Базаров, Любовь Усольцева гэгшэдэй шаби ерэхэ намар 16 наһатай болохо юм. Энэ мүрысөөндэ өөрһөөнь аха басагадаар тэмсээ гээд хэлэлтэй.
Буряадай суглуулагдамал командын гэшүүд бусад шангай һууринуудые эзэлжэ шадаагүйнь харамтай. Мүн 5-дахи һуури эзэлһэн тамиршадые нэрлэхэ хэрэгтэй. Эдэ хэд бэ гэбэл, Анастасия Щербак, Алима Митыпова, Зоя Базарова болон Алина Хандажапова гэгшэд болоно.
Автор: Борис БАЛДАНОВ
Фото: vk.com/wrestrus_ru
