Омогорхомоор олон медаль

Эдир боксёрнууд Нижегородско можодо суглараа. Буряадай тамиршад тэндэ зургаан медаль абаһан байна.

12-13 наһатай тамиршадай дунда Ивалгын аймагай Анастасия Байс түрүү һуури эзэлһэн байна. Багахан Анастасия дэлхэйн Кубогта шангай һуури эзэлһэн Оюна Абдулмуслимовагай ударидалга доро һорилго хэнэ.

Улаан-Үдэ хотын Альфия Богатова болон Александра Васильева 10-11 наһатай тамиршадай дунда мүнгэн медальнуудаар шагнагдаа.

Санжана Батуева, Станислав Сотников болон Станислав Сугробов гэгшэд шангай 3-дахи һууринуудые эзэлээ.

Буряадай ехэшүүл өөрын талмай дээрэ оройдоол дүрбэн медаль абаа һэн  гээд һануулая. Ургажа ябаа залуу халаан өөһэдын наһанай мүрысөөндэ зургаан медаль абажа шадаа. Буряадай тайска боксын ерээдүй аха захатанаа дахан, һайн дүнгүүдые харуулха гээд һанагдана.