Тамирай тобшо һонинууд

Футбол

Улаан-Үдэ. “Бурятия” гэһэн футболой команда ээлжээтэ халаанаа Ородой чемпионадта эхилхэнь. Хэдэн жэлэй хугасаада тэдэ һайн дуратанай командануудай дунда наадана гээд һануулая.

Мүнөө жэл “Сибирь” бүлэгтэ 15 команда наадахань гээд, хэлэхэ шухала. Түрүүшынгээ уулзалга “Бурятия” команда өөрын талмай дээрэ майн 8-да үнгэргэхэ. “Чита-2” гэһэн командын футболистнууд айлшаар Улаан-Үдэ бууха. Майн 13-да Кемеровскэ можын “Распадская” гэһэн команда Буряадай ниислэл ерэхэ. Май һарын дүүрэтэр “Бурятия” команда үшөө хоёр наада Барнаул болон Рубцовск хотонуудта үнгэргэхэ.

 

Улаан-Үдэ. 2020 ондо байгуулагдаһан эдиршүүлэй футбольно лигын наадануудта Буряадай тамиршад анха түрүүшынхиеэ хабаадахань. Энэ мүрысөөндэ 2006 болон 2007 онуудай команданууд өөр өөрын наһанай бүлэгүүдтэ тэмсэхэ.

“U-17” бүлэгтэ 2006 ондо түрэһэн 11 команда  мүрысэхэ юм.  “U-16” бүлэгтэ 2007 ондо түрэһэн хүбүүдэй дунда шанга тулалдаануудта 12 команда оролсохоор хараалагданхай. Майн 14-15-ай үдэрнүүдтэ Буряадай эдиршүүл түрүүшынгээ наадануудые үнгэргэхэ.

 

Һур харбалга

Алушта (Крым Улас). Зунай халаанай хаһын түрүүшын мүрысөөнүүд эхилбэ. Ород гүрэнэй тамиршадай дунда чемпионадта 30 можо хизаарай 256 хүн хабаадаа.

Буряадай тамиршад оройдоол нэгэ медаль абажа шадаа. Доржо Банзаровай нэрэмжэтэ Буряадай гүрэнэй дээдэ һургуулиин оюутан Эржена Очирова шангай 2-дохи һуури эзэлээ. Залуу тамиршан Сэлэнгын аймагай Ташар һууринда мэдээжэ һоригшод Дулма ба Велингтон Иринцеевтэнэй ударидалга доро номо һуршаар харбажа һураа.

Эдэ үдэрнүүдтэ Алуштада Ородой Кубогта хүртэхын түлөө мүрысөөн болоно, апрелиин 28-да түрүү һуури эзэлэгшэд элирхэ.

 

Самбо

Новороссийск. Ветерануудай дунда Ородой чемпионат үнгэргэгдэбэ. Буряадай тамиршад эндэ хабаадажа, яһала һайн дүнгүүдые харуулаа.

30-34 наһатай тамиршадай дунда чемпионой нэрэ зэргэдэ Татьяна Мужанова хүртөө. 35-39 наһатай тамиршадай дунда аха дүү Вадим ба Антон Бусеевүүд шалгараа. Вадим мүнгэн медаль абаа, Антон хүрэл медаляар шагнагдаа.

 

Хабаровск. 12-14 наһатай тамиршадай дунда Алас Дурна зүгэй мүрысөөндэ Буряадай самбо барилдаашад нэгэ медаль абажа шадаа. 50 килограммай шэгнүүртэ Сандан Генинов 3-дахи һуури эзэлээ.

 

Бокс

Шэтэ. 13-14 наһатай хүбүүдэй дунда Алас Дурна зүгэй чемпионадта 147 хүн хабаадаа. Буряадай эдир боксернууд 8 медальтай гэртээ бусаба.

Матвей Желеков болон Даниил Михайлов түрүү һууринуудые эзэлжэ, Ородой чемпионадта хабаадаха эрхэдэ хүртөө.