Түрүүшүүлэй тоодо

Уласхоорондын мүрысөөнүүдтэ хабаадаха эрхэ алдаһан Ородой тамиршад бүхэроссиин тэмсээнүүдтэ хабаадаха гэжэ оролдоно. Тиимэһээ энэ хэмжээ ябуулгые Боксын федераци зорюута эмхидхээ гээд хэлэлтэй. Тэмсээн Агууехэ Илалтын 77 жэлэй ойдо зорюулагдаа. 142 тамиршан тус мүрысөөндэ хабаадаһан байна.

60 килограммай шэгнүүртэ Радна Цыбиков Татарстан Уласай болон Санкт-Петербург хотын тамиршадые илажа шадаа. Мүн финальна уулзалгада шүүгшэдэй һанамжаар Краснодарска хизаарай Михаил Григорянда шүүгдэшөө. Тиигэжэ Буряадай боксёр мүнгэн медаляар шагнагдаа.

Тус мүрысөөндэ хабаадаһан үшөө нэгэ Буряадай тамиршан Сандан Санданов нэгэ уулзалга үнгэргэжэ, шүүгшэдэй шиидхэбэреэр диилдэһэн байна.

Май һарада бүхэроссиин хэдэн мүрысөөн болохоор хараалагдана.  Буряадай олон тамиршад тэндэ хабаадаха юм.