Суутай даргада зорюулагдаа

- Александр Попов манай академидэ тамирые тэнгэри хүрэтэр үргэһэн  байна. Тамирша хүбүүд басагад академидэ һураха дуратай болоо. Мүн юрын оюутад олоороо спортын элдэб зүйлнүүдээр бэеэ һорижо эхилээ. Ректорэй ашаар тамирай  шэнэ комплекс  бодхоогдожо, уласай бүхы  ажаһуугшадые баярлуулаа. Александр Петровичой хэһэн ажалые орхингүй, үргэжэ ябахабди, - гэжэ БГСХА-гай ректор, Буряад Уласай Арадай Хуралай һунгамал Бэликто Цыбиков тэмдэглэн хэлэнэ.

Мүрысөөнэй үедэ тамирай  байшанай  ханада Александр Поповые мүнхэлһэн тусхай самбар үлгэгдөө.

Барилдаанай найрта Буряад Уласай болон Эрхүү можын 117 тамиршад хибэс дээрэ гараа. Буряадай түрүү барилдаашадай эндэ бэеэ туршаһаниинь гайхалгүй. Тэдэнэй олониинь Буряадай хүдөө ажахын академидэ һураһан байна, мүнөөшье һурана.

Өөр өөрын шэгнүүртэ түрүү һуури хэд эзэлээб гэбэл, Алдар Шойжинимаев, Тамир Гармаев, Евгений Доржиев, Игорь Упхоев, Александр Балтуев, Никита Жаргалов, Артур Елбаскин, Алексей Арганов гэгшэд болоно.

Барилдаанай иимэ хэмжээ ябуулга жэл бүри эмхидхэгдэжэ, заншалта болохо ёһотой гэжэ эмхидхэгшэд мэдүүлнэ.