Үнөөхил Бразилиин басаган

Дэлхэйн чемпионадта энэ удаа  тамиршад олоор хабаадаа гээд  эмхидхэгшэд мэдүүлнэ. Бүхы дээрээ 73 гүрэнэй 310 эхэнэр ринг дээрэ гараа.

Буряадай “Номто” гэһэн спортын клубай гэшүүн Наталья Шадрина һүүлшын жэлнүүдтэ Серби гүрэниие түлөөлнэ  гээд һануулая. Уласхоорондын хэдэн мүрысөөнүүдтэ эрхим дүнгүүдые харуулаад, тэрэ дэлхэйн чемпионадта хабаадаха эрхэдэ хүртөө һэн.

60 килограмм хүрэтэр шэгнүүртэ Наталья гурбан уулзалга үнгэргөө. Урда Солонгосой Йонджи О болон Англиин Шонна Уайтвелл гэгшэдые шадамар бэрхээр шүүжэ гараа. Майн 16-да болоһон  шатада Бразилиин Ясмин Ферейрэтэй тэмсээ. Эдэ хоёр бэе бэеэ һайнаар таниха. Юуб гэхэдэ, 2019 ондо Улаан-Үдэ хотодо үнгэргэгдэһэн дэлхэйн чемпионадта энэл шатада тэдэ уулзаа бэлэй. Тиихэдэ Бразилиин түлөөлэгшэ илалта туйлаа һэн. Энэшье удаа Урда Америкын басаган шүүжэ шадаа.

Наталья Шадрина дэлхэйн чемпионадта хоёр дахин 8 эрхим тамиршадай тоодо орожо шадаһандань баярламаар. Удаадахи мүрысөөнүүдтэ һайнаар шаасалдаха бэзэ гээд найдагдана.