​Тамирай тобшо һонинууд

Футбол

Улаан-Үдэ. “Ород гүрэнэй эдиршүүлэй футбольно лигэ” гэһэн түсэлдэ Буряадай түлөөлэгшэд мүнөө жэлһээ хабаадажа эхилбэ. Алас Дурна зүгтэ мүрысөөн хоёр наһанай бүлэгтэ эмхидхэгдэнэ.

Буряадай футболистнууд түрүүшынгээ наадануудые Улаан-Үдэдэ үнгэргөө. 2006 оной хүбүүд аяар холын Петропавловск-Камчатский  хотын айлшадаар нааданда  2:1 гэһэн тоотойгоор илалта туйлаа. 2007 ондо түрэһэн  хүбүүдэй команда 1:0 гэһэн тоотойгоор шүүжэ гараа.

Майн 18-да Якутск хотын команда Буряадай ниислэл ерэхэ юм.

 

Улаан-Үдэ. Ородой чемпионадта хабаададаг һайн дуратанай командануудай мүрысөөн үргэлжэлһөөр.

3-дахи лигэдэ наададаг “Бурятия” команда ээлжээтэ уулзалгаяа Улаан-Үдэдэ үнгэргөө. Нёдондо  Сибирь бүлэгтэ түрүүлһэн Междуреченск хотын “Распадская” команда ерэжэ, 1:0 гэһэн тоотойгоор талмайн эзэдые диилэжэ гараа.

3-дахи турай һүүлээр “Бурятия” команда 8-дахи һуури эзэлнэ. Удаадахи наадануудаа тэдэ Барнаул болон Рубцовск хотонуудта үнгэргэхэ юм.

 

Барилдаан

Москва. “Poddubny Wrestling League (PWL)” гэһэн хэмжээ ябуулга Ород гүрэн дотор анха түрүүшынхиеэ эмхидхэгдэнэ. Барилдаануудта 1 мянга гаран тамиршад хабаадахаар хараалагданхай.

Энэ мүрысөөндэ Буряадай хэдэн тамиршад хабаадаха түсэбтэй.  Эрэшүүлэй дунда Баяр Баендуев бэеэ туршаха. Эхэнэрнүүдэй дунда тулалдаануудта Ирина Ологонова, Ульяна Тукуренова, Жаргалма Цыремпилова, Кристина Тамразян, Вероника Чумикова, Мунсэл Цыденова болон Мария Кузнецова гэгшэд оролсохо гээд һоригшод мэдүүлнэ.

Энэ хэмжээ ябуулга майн 19-20-ой үдэрнүүдтэ болохо юм.

 

Ага тосхон. Буряадай эрэшүүлэй суглуулагдамал команда эдэ үдэрнүүдтэ Ородой чемпионадта бэлэдхэл хэжэ байнхай. Июниин 24-26-ай үдэрнүүдтэ Кызыл хотодо үнгэргэгдэхэ Ородой чемпионадта Буряадай 15 тамиршад хабаадаха эрхэдэ хүртэнхэй.

- Үшөө апрель һарада бидэ Түнхэнэй аймагта һорилго хэһэн байнабди. Мүнөө тамиршаднай Агада  һорилгын 2-дохи шатада  хабаадана. Удаань Улаан-Үдэдэ бэлэдхэл хээд, Кызыл гарахабди, - гэжэ гүрэнэй һоригшо Цыбик Максаров мэдүүлнэ.

 

Тхэквондо (ИТФ)

Улаан-Үдэ. “Байгалай Кубок” гэһэн бүхэроссиин мүрысөөн 700 гаран тамиршадые суглуулаа. Буряадай ниислэлдэ 12 можо хизаарай түлөөлэгшэд ерэжэ мүрысөө. Монголой аяар 95 хүн тэмсээнүүдтэ хабаадалсаа.

Шанга тулалдаануудай удаа талмайн эзэд 138 медаль абажа шадаа. 40 алтан медальнуудай нэгыень мэдээжэ Буряадай тамиршан Александр Бодров шүүгээ. Тэрэ спарринг тулалдаанда Ородой 5 дахин чемпион болоһон тамиршаниие илажа шадаа. Харин өөрөө Александр Ородой чемпионадта 8 дахин эрхимлэһэн намтартай.

 

Шатар

Сочи. Командануудай дунда Ородой чемпионадта Буряадай шатаршад хабаадаа. Дээдэ лигын наадануудта 34 команда оролсоо. Эрдэм Хубукшанов Новосибирскын суглуулагдамал командын түлөө наадажа, чемпионой нэрэ зэргэдэ хүртөө. Челябинск хотын “Южный Урал-2” команда шангай 3-дахи һуури эзэлээ. Тус командын бүридэлдэ Буряадай гроссмейстер Антон Шомоев наадаһан байна.

 

Бокс

Эрхүү. 17-18 наһатай басагадай дунда Ородой чемпионат Эрхүү хотын “Труд” гэһэн спортын танхимда үнгэргэгдэжэ, майн 14-дэ түгэсэбэ. Тус мүрысөөндэ Буряадай оройдоол нэгэ тамиршан хабаадаа. Теэд амжалта туйлажа шадаагүйнь харамтай.

 

Хүнгэн атлетикэ

Туран. Майн 28-да “Тункинский полумарафон” гэһэн ээлжээтэ ехэ мүрысөөн үнгэргэгдэхэнь. Туран һууринһаа Бурхан баабай хүрэтэр тамиршад зай гаталха. Дуратайшуул 3 километр гаталха аргатай. Үнинэй бэеэ һорижо байһан хүнүүд 21 километршье гүйхэ юм. 2021 ондо тус хэмжээ ябуулгада 500 гаран хүн хабаадаа һэн.